Xalq deputatlari Termiz shahar Kengashining 12-“Saxovat” saylov okrugi deputati X.Jurayev hamda kotibiyat bosh mutaxassisi A.Temirovlar “Saxovat” mahallasida bo‘lib, deputatning “Ko‘chama-ko‘cha deputat daftari”ga kiritilgan murojaatlar yuzasidan joyiga chiqib o‘rganish olib bordilar.

O‘rganish davomida mahallaning Fayoztepa ko‘chasini asfaltlashtirish bo‘yicha fuqarolar tomonidan bildirilgan murojaat atroflicha ko‘rib chiqildi. Mutasaddilar va deputat ishtirokida ko‘chaning bugungi holati ko‘zdan kechirilib, mavjud muammo, yo‘lning texnik holati hamda uni ta'mirlash bo‘yicha zarur chora-tadbirlar yuzasidan fikr almashildi.

Ta'kidlash joizki, deputatlik faoliyatida “Ko‘chama-ko‘cha deputat daftari” faqat murojaatlarni qayd etish vositasi bo‘lib qolmay, balki har bir murojaatning amaliy ijrosi ustidan tizimli nazorat olib borishning muhim mexanizmi hisoblanadi. Shu bois har bir murojaat joyiga chiqib o‘rganilib, unda qayd etilgan muammolarni bartaraf etish bo‘yicha mas'ul tashkilotlar bilan hamkorlikda amaliy choralar ko‘rilmoqda.

Mazkur o‘rganish davomida ham deputat daftari asosida olib borilayotgan ishlar amalda namoyon etilib, murojaatlarni joyida ko‘rib chiqish, holatni hujjatlashtirish va keyingi nazoratni ta'minlashga alohida e'tibor qaratildi.

Xalq deputatlari Termiz shahar Kengashi tomonidan fuqarolarni o‘ylantirayotgan muammolarni joyida o‘rganish, ularning yechimi yuzasidan mas'ul tashkilotlar faoliyatini muvofiqlashtirish hamda deputatlik nazoratini kuchaytirish ishlari izchil davom ettirilmoqda.