Termiz shahrida mahallalar infratuzilmasini yaxshilash, qish mavsumiga tayyorgarlik ko‘rish hamda aholi uchun qulay shart-sharoitlarni yaratish borasidagi ishlar deputatlarning qat’iy nazoratida davom etmoqda.

Xalq deputatlari Termiz shahar Kengashi raisi, 9-“Abdulla Avloniy” saylov okrugi deputati D.Normuradova hamda Kengash kotibiyati bosh mutaxassisi R.Mamashukurovlar o‘z okrugiga qarashli “Abdulla Avloniy” mahallasida bo‘lib, hududda amalga oshirilayotgan ishlar bilan yaqindan tanishdilar.

Mazkur nazorat-tahlil jarayoni Oliy Majlis Senati tomonidan mahalliy Kengash deputatlari faoliyati uchun belgilangan “Mahalliy Kengash deputati faoliyatining eng muhim 24 ta yo‘nalishi” mezonlari doirasida tashkil etildi.

Tashrif davomida mahallada amalga oshirilishi belgilangan yirik loyihalar, xususan, qozonxona va issiqlik tarmog‘ini qurish hamda energiya tejovchi uskunalarni o‘rnatish ishlari ko‘zdan kechirildi.

O‘rganishlar davomida bir qator ijobiy ishlar bilan birga, e’tiborni tortishi lozim bo‘lgan jiddiy kamchiliklar ham kuzatildi:

• 🛠️ Chala qolgan quvur ishlari: Issiqlik tarmog‘i uchun quvurlarni o‘tkazish jarayonida ishlar oxiriga yetkazilmagani, qazish ishlari chala qolgani aniqlandi;

• 🛝 Abgor holatdagi bolalar maydonchasi: Mahalladagi yosh bolajonlar dam olib, o‘ynaydigan maydoncha qarovsiz va abgor holatga kelib qolgani ma'lum bo‘ldi.

——————————

✍️ Muammolarga yechim: Deputatlik so‘rovi yuboriladi!

Hududda aniqlangan mazkur kamchiliklarni zudlik bilan bartaraf etish, chala qolgan issiqlik tarmog‘i ishlarini sifatli yakunlash hamda bolalar maydonchasini qayta ta’mirlab, aholi foydalanishiga topshirish maqsadida:

1. Aniqlangan barcha muammolar deputatning shaxsiy murojaat daftariga qayd etildi;

2. Mas’ul idoralar va pudratchi tashkilotlarga qat’iy talablar qo‘yilgan holda rasmiy deputatlik so‘rovi yuborilishi belgilab olindi.

💬 D.Normuradova: "Aholimizning qishda issiq uyda yashashi va bolajonlarimizning xavfsiz o‘yingohlarga ega bo‘lishi — bizning ustuvor vazifamizdir. Issiqlik tarmog‘ini tortish ishlarining chala tashlab ketilishi va bolalar maydonchasining abgor holatda turishi mutlaqo qabul qilinib bo‘lmaydigan holat. Mutasaddilardan ishni oxiriga yetkazishni qat'iy talab qilamiz va nazoratni to‘xtatmaymiz," — deya ta'kidladi Kengash raisi.