O‘zbekiston Respublikasi mustaqilligining 35 yilligi mamlakatimizda amalga oshirilayotgan keng ko‘lamli islohotlar, bunyodkorlik va obodonlashtirish ishlarini sarhisob qilish uchun muhim fursatdir.

Mustaqillik yillarida yurtimizda barcha sohalar qatori atrof-muhitni muhofaza qilish, ekologik barqarorlikni ta’minlash va hududlarni ko‘kalamzorlashtirishga ham alohida e’tibor qaratib kelinmoqda.

Bugungi kunda bu boradagi ezgu ishlar “Yashil makon” umummilliy loyihasi doirasida izchil davom ettirilmoqda. Xususan, O‘zbekiston Respublikasi Prezidentining 2026-yil 25-martdagi PF-47-son “Yashil makon” umummilliy loyihasi samaradorligini yanada oshirish chora-tadbirlari to‘g‘risida”gi Farmoni bilan yashil maydonlarni kengaytirish, mavjud yashil hududlarni samarali boshqarish va ekologik barqarorlikni yanada mustahkamlash bo‘yicha muhim vazifalar belgilangan.

Bu ishlarning amaliy natijalarini Ishtixon tumanida ham yaqqol ko‘rish mumkin. 2026-yil bahor mavsumida “Yashil makon” umummilliy loyihasi doirasida tumanda mevali, manzarali va buta daraxt ko‘chatlari ekilib, hududlarni ko‘kalamzorlashtirish borasida keng ko‘lamli ishlar amalga oshirildi.

Jumladan, tuman hududidagi ishlab chiqarish korxonalari tomonidan 14 mingdan ortiq manzarali va mevali daraxt ko‘chatlari ekilib, “Yashil belbog‘lar” barpo etilmoqda. Barlos mahallasida 0,35 gektar maydonda 450 tup mevali va manzarali ko‘chat ekilib, Ekologiya bog‘i tashkil etildi.

Shuningdek, yashil hududlarni kengaytirish bilan bir qatorda, ularni saqlash va parvarishlash masalasiga ham alohida e’tibor qaratilmoqda. Gulobod mahallasida 1650 dona manzarali daraxt ko‘chatlari ekilib, “Yashil bog‘” tashkil etilgan bo‘lsa, Qoraqo‘yli va Ko‘tarma mahallalaridan o‘tuvchi yo‘l atrofiga 2200 dona manzarali daraxt ekildi.

“Yashil makon” loyihasining eng muhim jihati — daraxt ekish bilangina cheklanib qolmasdan, ekilgan nihollarni asrab-avaylash va parvarish qilishdir. Zero, bugun ekilgan har bir daraxtning ertaga ildiz otib, yashab ketishi va yurtimiz ko‘rkiga ko‘rk qo‘shishi, avvalo, bizning mas’uliyatimizga bog‘liq.

Shu maqsadda tumanda 2026-yil kuz mavsumida “Yashil makon” umummilliy loyihasi doirasida 700 ming dona ko‘chat ekish rejalashtirilgan. Buning uchun daraxt ekiladigan yer maydonlari tuman hokimligi bilan hamkorlikda tanlab olinib, zarur hududlarda yer osti quduqlarini qazish, shuningdek, hududlarning tabiiy-iqlim sharoitiga mos daraxt va buta ko‘chatlarini ekish ishlari tashkil etilmoqda.

Bugungi islohotlarning yana bir muhim jihati — aholining, ayniqsa, yoshlarning ekologik madaniyatini yuksaltirishdir. Tabiatni asrash faqatgina mas’ul tashkilotlarning emas, balki har birimizning fuqarolik burchimizdir. Ona tabiatga mehr, daraxt va nihollarga e’tibor, yashil hududlarni asrab-avaylash — kelajak avlod oldidagi mas’uliyatimizning amaliy ifodasidir.

Mustaqillikning 35 yilligi arafasida oldimizda turgan eng ezgu maqsadlardan biri — obod, ko‘rkam, ekologik jihatdan barqaror va kelajak avlod uchun munosib yurt barpo etishdir. “Yashil makon” loyihasi doirasida amalga oshirilayotgan har bir bunyodkorlik va ko‘kalamzorlashtirish ishlari ana shu ulug‘ maqsadga xizmat qilmoqda.

Men deputat sifatida tumanimizda bu boradagi ishlarning samarali tashkil etilishi, ekilgan ko‘chatlarning parvarishi va yashil hududlarning asrab-avaylanishiga jamoatchilik vakili sifatida o‘z hissamni qo‘shishni muhim vazifa deb bilaman.