Bugungi kunda aholining turmush farovonligini oshirish, hududlarda zamonaviy infratuzilmani shakllantirish hamda elektr energiyasidan samarali va oqilona foydalanishni ta’minlash muhim vazifalardan biridir. Bu borada qonunchilik talablarining joylarda qay darajada ijro etilayotganini o‘rganish deputatlik nazoratining muhim yo‘nalishlaridan hisoblanadi.

O‘zbekiston Respublikasining 2024-yil 7-avgustdagi O‘RQ–940-son “Energiyani tejash, undan oqilona foydalanish va energiya samaradorligini oshirish to‘g‘risida”gi Qonuni ijrosi doirasida Marg‘ilon shahrida navbatdagi deputatlik o‘rganishi tashkil etildi.

O‘rganish Xalq deputatlari Marg‘ilon shahar Kengashi kotibiyat mudiri A.Ermatov, doimiy komissiya raisi A.Mahkamov, kotibiyat bosh mutaxassisi Z.Yakubova hamda Oliy Majlis Qonunchilik palatasi deputatlari N.Tilavoldiyev va M.Salimova ishtirokida 14-Ma’orif saylov okrugiga qarashli “Ma’orif” mahallasida joyiga chiqqan holda o‘tkazildi. Unda mahalla raisi va hokim yordamchilari ham ishtirok etdi.

O‘rganish davomida “Ochiq budjet”ning 2026-yil ikkinchi mavsumida yetarli ovoz to‘play olmagan, elektr ta’minotini yaxshilashga qaratilgan loyiha bilan bog‘liq masalaga alohida e’tibor qaratildi.

Joyiga chiqib o‘rganish jarayonida mahalladagi elektr tarmoqlarining mavjud holati, eskirgan infratuzilma hamda aholiga elektr energiyasini barqaror va sifatli yetkazib berish bilan bog‘liq muammolar ko‘zdan kechirildi. Aholi vakillari tomonidan mavjud muammolar va ularning kundalik hayotiga ta’siri yuzasidan fikr-mulohazalar bildirildi.

Shuningdek, O‘RQ–940-son Qonunda belgilangan energiyani tejash, undan oqilona foydalanish va energiya samaradorligini oshirish, shuningdek, ushbu sohada qonuniylik, hisobdorlik, ochiqlik va shaffoflikni ta’minlash masalalari yuzasidan mavjud holat o‘rganildi.

Deputatlar tomonidan elektr ta’minotidagi mavjud muammolarni bartaraf etish, energiya resurslaridan samarali foydalanish hamda eskirgan tarmoqlarni bosqichma-bosqich yangilash bo‘yicha mas’ullar bilan fikr almashildi.