Bugungi kunda atrof-muhitni muhofaza qilish, yashil hududlarni kengaytirish va aholi uchun qulay ekologik muhit yaratish mamlakatimizda amalga oshirilayotgan islohotlarning muhim yo‘nalishlaridan biriga aylandi. Shu maqsadda ilgari surilgan "Yashil makon" umummilliy loyihasi doirasida yurtimizning barcha hududlarida daraxt va butalar ekish, yangi bog‘lar hamda yashil hududlar barpo etish ishlari izchil davom etmoqda. 

Daraxtzorlarni ko‘paytirish nafaqat hududlarni obod va ko‘rkam qilish, balki ekologik muvozanatni ta’minlashda ham muhim ahamiyat kasb etadi. Yashil hududlar havoni tozalash, chang va zararli moddalarni kamaytirish, yozning issiq kunlarida soya-salqinlik yaratish hamda tuproq eroziyasining oldini olishga xizmat qiladi.

"Yashil makon" loyihasi doirasida ko‘chat ekish ishlari, ayniqsa, mahallalar, yo‘l bo‘ylari, ta’lim va tibbiyot muassasalari hududlari, korxona va tashkilotlar atrofi hamda bo‘sh maydonlarni obodonlashtirish bilan uyg‘un holda olib borilmoqda. Bu jarayonda manzarali va mevali daraxtlarni ekish, ularni parvarishlash, sug‘orish va asrashga alohida e’tibor qaratilmoqda. 

Eng muhimi, loyiha aholining ekologik madaniyatini yuksaltirishga ham katta turtki bermoqda. Zero, har bir ekilgan nihol - kelajak uchun qilingan ezgu sarmoyadir. Bugun biz ekkan daraxtlar ertaga farzandlarimiz va nabiralarimiz uchun sog‘lom muhit, musaffo havo va go‘zal tabiat bag‘ishlaydi.

Xo‘jayli tumanida ham hududlarni ko‘kalamzorlashtirish, mahallalar qiyofasini yanada obodonlashtirish va yashil maydonlarni kengaytirish borasidagi ishlar muhim ahamiyat kasb etadi. Bu borada jamoatchilik, mahalla faollari, yoshlar, korxona va tashkilotlar hamda deputatlarning faol ishtiroki yaxshi samara bermoqda.

Ayniqsa, yosh avlodni tabiatga mehr va mas’uliyat ruhida tarbiyalash, ularni daraxt ekish va uni parvarishlash ishlariga jalb etish kelajak uchun muhim vazifadir. Chunki ekologik madaniyat bolalikdan shakllanadi va har bir insonning kundalik hayotida namoyon bo‘ladi. 

"Yashil makon" - bu shunchaki daraxt ekish kampaniyasi emas, balki yurtimiz kelajagini yashil, obod va farovon qilishga qaratilgan keng qamrovli harakatdir. Har bir niholga e’tibor va g‘amxo‘rlik bilan yondashsak, mahallalarimiz yanada ko‘rkam, havomiz musaffo, tabiatimiz esa yanada boy va go‘zal bo‘ladi.

Yashillikni ko‘paytirish - tabiatni asrash, tabiatni asrash esa kelajakni asrashdir!

Z.Klochkov
Xalq deputatlari Xo‘jayli tuman Kengashi deputati