Termiz shahrida mahallalar infratuzilmasini yaxshilash, "mahalla yettiligi" va faollar ish faoliyatini tahlil qilish hamda aholini qiynayotgan muammolarni bevosita joyiga chiqqan holda o‘rganish borasidagi deputatlik nazorati izchil davom ettirilmoqda.

Xalq deputatlari Termiz shahar Kengashi kotibiyati mudiri, deputat A.Ashurov hamda kotibiyat bosh mutaxassisi R.Mamashukurovlar Kengashning 25-“Kokildorota” saylov okrugi deputati M.Sidiqova okrugiga qarashli “Alisher Navoiy” mahallasida bo‘ldilar.

Mas’ullar va deputat dastlab mahalla idorasida bo‘lib, mahalla faollari va "mahalla yettiligi" vakillarining bugungi kundagi faoliyatlari, aholi murojaatlari bilan ishlash holati yuzasidan atroflicha suhbat olib bordilar.

Ushbu jarayon Oliy Majlis Senati tomonidan belgilangan “Mahalliy Kengash deputati faoliyatining eng muhim 24 ta yo‘nalishi” mezonlari asosida tashkil etildi.

Suhbatdan so‘ng, deputatlar hududdagi mavjud muammolarni bevosita joyiga chiqqan holda o‘rgandilar. Mahalla ichki yo‘llarining ahvoli ko‘zdan kechirilganda, Qirqqiz 2 ko‘chasi ta’mirtalab holatda ekanligi, yo‘l qoplamasining yemirilganligi piyodalar va transport vositalari harakatiga noqulaylik tug‘dirayotgani aniqlandi.

Aniqlangan ushbu yo‘l muammosi deputat murojaat daftariga batafsil qayd etildi. Mazkur ko‘chani ta’mirlash va tartibga keltirish ishlarini amalga oshirish yuzasidan mutasaddi tashkilotlarga deputatlik so‘rovlari yuborilishi belgilab olindi.