Korrupciyaǵa qarsı gúresiw, sociallıq taraw, jaslar siyasatı, mádeniyat hám sport máseleleri boyınsha turaqlı komissiyanıń májilisi bolıp ótti.
Májilistiń kún tártibindegi ekinshi másele — Bozataw rayonı sport mektebiniń 2025–2026 oqıw jılı juwmaǵı boyınsha atqarǵan jumısları hám 2026–2027 oqıw jılında ámelge asırılatuǵın wazıypalar haqqında boldı.
Kún tártibindegi másele boyınsha Bozataw rayonı sport mektebi direktorı B. Xojamuratovtıń esabatı tıńlandı.
Esabatqa kóre, 2025–2026 oqıw jılı dawamında sport mektebinde 21 sport túri boyınsha shınıǵıwlar alıp barılǵan. Olar arasında olimpiya sport túrleri menen birge milliy sport túrleri, Aziya oyınlarına kiritilgen sport túrleri hám para sport baǵıtları da qamtılǵan.
Búgingi kúnde mektepte 860 sportshı jas sport penen turaqlı túrde shuǵıllanıp atırǵan bolıp, olardıń 314 qız balalar ekenligi aytıldı. Bul bolsa rayon jaslarınıń bos waqtın mazmunlı ótkeriwinde, salamat turmıs tárizin qáliplestiriwde hám sportqa bolǵan qızıǵıwshılıǵın arttırıwda sport mektebiniń ornı joqarı ekenligin kórsetedi.
Sportshılardı tayarlaw baǵıtında 19 trener xızmet etip atırǵan bolıp, olardıń 5 hayal-qızlar. Trenerlerdiń bilim hám kásiplik dárejesin arttırıw, kategoriyalar menen támiyinlew boyınsha da tiyisli jumıslar alıp barılǵan.
🏆 JETİSkenlikler — JASLAR MIYNETİNİŃ NÁTIYJESİ
2025–2026 oqıw jılı dawamında Bozataw rayonı sport mektebiniń tárbiyalanıwshıları Ózbekstan chempionatları hám kuboklarında tabıslı qatnasıp, jámi 35 medal jeńip aldı.
Solardıń ishinde:
- 6 altın medal
- 7 gúmis medal
- 22 bronza medal
Sonday-aq sport mektebi sportshıları Aziya chempionatı hám kuboklarında 1 medalǵa iye bolǵan.
Májiliste bul jetiskenlikler menen birge, aldaǵı oqıw jılında sportshılardıń tayarlıq sapasın jáne de arttırıw, joqarı nátiyjelerge erisiw, jaslardı sportqa keńnen tartıw hám qız balalardıń sport penen shuǵıllanıwın jáne de rawajlandırıw máselesine ayrıqsha itibar qaratıw zárúrligi atap ótilgen.
Sonday-aq 2026–2027 oqıw jılında sport mektebiniń materiallıq-texnikalıq bazasın bekkemlew, sport túrlerin rawajlandırıw, uqıplı hám talantlı jaslardı anıqlaw, olardı respublikalıq hám xalıqaralıq jarıslarda qatnasıwǵa sapalı tayarlaw boyınsha tiyisli wazıypalar belgilep alındı.
Májilis juwmaǵında kún tártibindegi másele boyınsha pikirler tıńlanıp, sport tarawındaǵı jumıslardı jáne de jetilistiriwge qaratılǵan usınıslar bildirilip, tiyisli tapsırmalar belgilendi.