Xalq deputatlari Parkent tumani Kengashiga 20-“Ulug‘bek” saylov okrugidan saylangan deputat Sultonov Azimjon O‘ktam o‘g‘li tomonidan o‘zi saylangan okrug hududidagi mahalla fuqarolari bilan o‘tkazilgan uchrashuvlarda bildirilgan taklif va murojaatlardan kelib chiqib, Parkent tumanida qattiq maishiy chiqindilarni o‘z vaqtida olib chiqish holatini o‘rganish maqsadida “ZERO-WASTE” MChJ Parkent tuman filiali faoliyati
deputatlik nazorati doirasida o‘rganildi.O‘rganish jarayonida O‘zbekiston Respublikasining 2002-yil 5-apreldagi “Chiqindilar to‘g‘risida”gi 362-II-son Qonuni ijrosi yuzasidan maxsus tuzilgan savolnoma asosida “ZERO-WASTE” MChJ Parkent tuman filiali rahbari Otabek Mirdavlatov hamda mas’ul xodim bilan suhbat o‘tkazildi.Suhbat davomida deputat tomonidan, avvalo, Parkent tumani hududida hosil bo‘layotgan qattiq maishiy chiqindilarni yig‘ish va olib chiqish ishlari tasdiqlangan reja-grafik asosida qay darajada amalga oshirilayotgani hamda ushbu jarayon qanday nazorat qilinayotgani yuzasidan savol berildi. Shuningdek, mahallalardagi chiqindi konteynerlarining yetarliligi, ularning aniq soni hamda sanitariya holati va belgilangan muddatlarda bo‘shatilishi qanday ta’minlanayotgani, shuningdek, mavjud kamchiliklarni bartaraf etish bo‘yicha ko‘rilayotgan choralar haqida aniq ma’lumot so‘raldi.Bundan tashqari, chiqindilarni yig‘ish va tashishda sanitariya hamda ekologik talablarga rioya etilishi, ushbu talablarning bajarilishi ustidan nazorat qanday tashkil etilgani va aniqlangan kamchiliklar bo‘yicha qanday choralar ko‘rilgani yuzasidan ham mas’ullardan tegishli javoblar olindi.Berilgan ma’lumotlarga ko‘ra, bugungi kunda korxonada 100 nafarga yaqin xodim faoliyat yuritmoqda. Korxona tasarrufida 17 ta chiqindi tashuvchi maxsus texnika, 224 ta chiqindi konteyneri hamda 3 ta chiqindi yig‘ish shoxobchasi mavjud.Korxonadagi barcha maxsus transport vositalariga masofadan turib onlayn nazorat qilish imkonini beruvchi GPS qurilmalari o‘rnatilgan. Mazkur tizim chiqindilarni belgilangan reja-grafik asosida olib chiqish, transport harakatini nazorat qilish va xizmat ko‘rsatish sifatini oshirishga xizmat qilmoqda. Ma’lum qilinishicha, bir sutkada tuman hududidan o‘rtacha 240 kub metr qattiq maishiy chiqindi olib chiqib ketilmoqda.Shuningdek, Parkent tumani hududidagi 53 ta mahalladan qattiq maishiy chiqindilar tasdiqlangan reja-grafik asosida “Signal” usulida muntazam ravishda olib chiqib ketilayotgani bildirildi.O‘rganish davomida korxona rahbarining sohaga oid fikr va takliflari tinglanib, mavjud muammolar hamda ularni bartaraf etish bo‘yicha amalga oshirilishi lozim bo‘lgan chora-tadbirlar muhokama qilindi.Shuningdek, “ZERO-WASTE” MChJ tomonidan O‘zbekiston Respublikasi Prezidentining 2024-yil 4-yanvardagi PF–5-son Farmoniga muvofiq, 1 milliard 200 million so‘m mablag‘ evaziga Parkent va Yuqorichirchiq tumanlaridan olib chiqilayotgan chiqindilarni qayta ishlashga yo‘naltirilgan markazlashgan chiqindi yuklash stansiyasini qurish rejalashtirilgani ma’lum qilindi.O‘rganish yakunlari bo‘yicha aholi murojaatlarida ko‘tarilgan masalalarni hal etish, chiqindilarni o‘z vaqtida olib chiqish tizimini takomillashtirish hamda hududlarda sanitariya-tozalik holatini yaxshilashga qaratilgan ishlarni kuchaytirish yuzasidan tegishli tavsiyalar bildirildi. Shuningdek, mazkur masalani atroflicha muhokama qilish va aniqlangan holatlar yuzasidan tegishli choralarni belgilash maqsadida masala Xalq deputatlari Parkent tuman Kengashining tegishli doimiy komissiyasi yig‘ilishida muhokama etilishi belgilandi.