Xalq deputatlari Qo‘qon shahar Kengashi deputati G.Payg‘amova tomonidan o‘zi saylangan hududdagi "Yangi obod" mahalla fuqarolar yig‘inida jinoyatchilik va huquqbuzarliklarning oldini olish hamda O‘zbekiston Respublikasining 2014-yil 14-mayda qabul qilingan O‘RQ–371-sonli “Huquqbuzarliklar profilaktikasi to‘g‘risida”gi Qonuni ijrosi yuzasidan amalga oshirilayotgan ishlar o‘rganildi.

O‘rganish jarayonida Xalq deputatlari Qo‘qon shahar Kengashi kotibiyati mudiri A.Nosirov hamda Kengash kotibiyatining bosh mutaxassisi A.Adhamov tomonidan amaliy ko‘mak ko‘rsatildi.

O‘rganish davomida mahalla hududida jamoat tartibini saqlash, huquqbuzarliklarning barvaqt oldini olish, fuqarolar xavfsizligini ta’minlash hamda profilaktika tizimi samaradorligini yanada oshirish borasida olib borilayotgan ishlar tahlil qilindi.

Xususan, mahallaga kirish va chiqish yo‘llarida o‘rnatilgan videokuzatuv kameralarining texnik holati, ularning uzluksiz ishlashi, kuzatuv qamrovi hamda jamoat xavfsizligini ta’minlashdagi ahamiyati joyiga chiqqan holda o‘rganildi. Shuningdek, videokuzatuv kameralarining uzluksiz va barqaror ishlashini ta’minlash maqsadida ularga muntazam texnik xizmat ko‘rsatish, profilaktik nazoratni kuchaytirish hamda mavjud kuzatuv tizimlarini doimiy monitoring qilib borish masalalari ham muhokama qilindi.

O‘rganish yakunida huquqbuzarliklarning oldini olish tizimini yanada takomillashtirish, videokuzatuv vositalaridan samarali foydalanish, fuqarolarning osoyishtaligi va xavfsizligini ta’minlash hamda mas’ul tashkilotlar o‘rtasidagi hamkorlikni yanada kuchaytirish yuzasidan tegishli tavsiya va takliflar bildirildi.

Xalq deputatlari Qo‘qon shahar Kengashi