Fuqarolarning murojaatlarini joyida o‘rganish va ularni qonunchilik doirasida ijobiy hal etish yuzasidan amaliy choralar ko‘rish deputatlik faoliyatining ustuvor yo‘nalishlaridan biridir. Xalq deputatlari Marg‘ilon shahar Kengashi deputatlari X.Abdurahmonov va A.Mahkamov tomonidan bu boradagi ishlar izchil davom ettirilmoqda.

Navbatdagi o‘rganish 13-Yoyilma saylov okrugidagi Yoyilma mahalla fuqarolar yig‘inining Asilobod ko‘chasida tashkil etildi.O‘rganishlar mahalliy Kengash deputatlari faoliyatining eng muhim yo‘nalishlari bo‘yicha ishlab chiqilgan 24 ta tavsiya asosida tashkil etildi. Aholidan kelib tushgan murojaatda ichimlik suvi quvurida yuzaga kelgan avariya sababli fuqarolar suv ta’minotida uzilishlar kuzatilayotgani hamda mavjud holat aholi uchun qator noqulayliklarni keltirib chiqarayotgani bildirilgan.

Deputatlar X.Abdurahmonov va A.Mahkamov murojaat yuzasidan voqea joyiga chiqib, mahalla faollari va ko‘chaboshilar ishtirokida mavjud holatni atroflicha o‘rgandilar. O‘rganish davomida avariya oqibatlarini tezkor bartaraf etish hamda ichimlik suvi ta’minotini barqaror tiklash bo‘yicha mas’ul tashkilotlar tomonidan amalga oshirilishi lozim bo‘lgan chora-tadbirlar muhokama qilindi.

Aniqlangan holatlarni bartaraf etish, mas’ul tashkilotlar faoliyatiga huquqiy baho berish hamda muammoning qisqa muddatlarda ijobiy hal etilishini ta’minlash maqsadida murojaat deputatnin koʻcha aylanish daftariga qayd etildi va Marg‘ilon shahar hokimining tegishli o‘rinbosariga deputat so‘rovi yuborilishi belgilandi.

Aholi manfaatlarini himoya qilish, hududlardagi dolzarb muammolarni o‘z vaqtida aniqlash va ularning yechimini ta’minlashga qaratilgan bunday o‘rganishlar deputatlik nazoratining amaliy samaradorligini oshirish bilan birga, fuqarolar va mahalliy davlat hokimiyati organlari o‘rtasidagi ochiq muloqotni yanada mustahkamlashga xizmat qilmoqda.