O‘rganish O‘zbekiston Respublikasi Oliy Majlisi Senati Kengashining 2025-yil 14-yanvardagi KQ-35-sonli qarori ijrosini ta’minlash hamda aholi bilan to‘g‘ridan-to‘g‘ri muloqotni kuchaytirish maqsadida amalga oshirildi.
Xalq deputatlari Termiz shahar Kengashi 8-O‘zbekiston saylov okrugi deputati M.Ruziyeva tomonidan fuqarolar xavfsizligi hamda elektr ta’minoti bilan bog‘liq muammolar yuzasidan o‘rganish ishlari olib borildi.
O‘rganish davomida “O‘zbekiston” mahallasidagi So‘lim diyor hamda Jaloliddin Manguberdi ko‘chalarida joylashgan elektr simyog‘ochlarining ayrimlari ma’nan va jismonan eskirgani, xizmat muddatini o‘tab bo‘lgani aniqlandi.
⚠️ Mazkur holat, ayniqsa, shamolli kunlarda elektr ta’minotining uzilishi bilan bir qatorda, aholi hayoti va xavfsizligiga ham xavf tug‘dirishi mumkin.
Shu sababli deputat tomonidan Termiz shahar Elektr ta’minoti korxonasi boshlig‘iga deputatlik so‘rovi yuborildi.
📌 So‘rovda quyidagi masalalarga alohida e’tibor qaratilgan:
🔹 “O‘zbekiston” mahallasining “So‘lim diyor” hamda “Jaloliddin Manguberdi” ko‘chalaridagi eskirgan elektr simyog‘ochlarini bosqichma-bosqich zamonaviy beton ustunlarga almashtirish;
🔹 mazkur ko‘chalardagi elektr uzatish tarmoqlari va simlarning texnik holatini qayta ko‘rib chiqish;
🔹 elektr ta’minotini xavfsiz, barqaror va uzluksiz yo‘lga qo‘yish;
🔹 amalga oshirilgan ishlar yuzasidan Xalq deputatlari Termiz shahar Kengashi kotibiyatiga asoslantirilgan javob taqdim etish.
📝 Deputatlik so‘rovi orqali ko‘tarilgan masala endilikda tegishli tashkilot tomonidan ko‘rib chiqilib, amaliy choralar ko‘rilishi kutilmoqda.
Deputatlik nazorati — muammoni aniqlash bilangina cheklanmaydi. Eng muhimi, aniqlangan muammo bo‘yicha amaliy yechimga erishishdir.