O‘rganishlar davomida “Temiryo‘lchi” va “Alisher Navoiy” mahallalari hududidan o‘tuvchi avtomobil yo‘li bo‘yida barpo etilayotgan piyodalar yo‘lagi (trotuar) hamda tungi yoritish tizimi qurilish ishlari ko‘zdan kechirildi.
Ma’lum bo‘lishicha, mazkur obyekt uchun “Infratuzilma va ijtimoiy barqarorlik” jamg‘armasi mablag‘lari hisobidan zarur moliyaviy resurslar ajratilgan bo‘lsa-da, ayrim qurilish-montaj ishlari bugungi kungacha to‘liq yakunlanmagan.
O‘rganish davomida quyidagi kamchiliklar aniqlandi:
piyodalar yo‘lagi qurilishi ayrim joylarda chala va sifatsiz bajarilgan;
tungi yoritish ustunlari o‘rnatilgan bo‘lsa-da, elektr kabellari to‘liq tortilmagan;
yoritish chiroqlari hali ishga tushirilmagan;
bajarilgan ishlarning sifati va mablag‘lardan foydalanish samaradorligi yuzasidan savollar mavjud.
Aniqlangan holatlar yuzasidan deputat tomonidan Termiz shahar hokimining birinchi o‘rinbosari Sh. Dusmuratov nomiga deputat so‘rovi yuborildi.
Deputat so‘rovida:
piyodalar yo‘lagi qurilishini belgilangan standartlar asosida yakunlash;
tungi yoritish tizimini to‘liq ishga tushirish;
ajratilgan mablag‘larning maqsadli sarflanishini o‘rganish;
pudratchi tashkilot tomonidan yo‘l qo‘yilgan kamchiliklarni bartaraf etish;
amalga oshirilgan ishlar yuzasidan foto va hujjatlar bilan asoslantirilgan ma’lumot taqdim etish masalalari ko‘tarildi.
Deputatlik nazoratining asosiy maqsadi — davlat mablag‘larining samarali sarflanishi, aholi uchun yaratilayotgan infratuzilma obyektlarining sifatli va belgilangan muddatlarda foydalanishga topshirilishini ta’minlashdan iborat.
Bugun yaratilayotgan piyodalar yo‘lagi va yoritish tizimi ertaga minglab fuqarolarning xavfsizligi va qulayligi uchun xizmat qilishi lozim.
Shu sababli har bir qurilish obyekti deputatlik nazoratida bo‘lishi muhim.
Har bir loyiha — xalq manfaatlari uchun, har bir muammo — nazorat ostida!