Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston Ekologik partiyasidan saylangan deputat Y.Narbekov tomonidan tumanning “Boyterak” mahallasiga biriktirilgan T.Mamirovning yoshlar bilan ishlash tizimi o‘rganildi.

O‘rganish davomida yoshlar yetakchisi tomonidan mahalladagi yoshlar kesimida shakllantirilgan ma’lumotlar bazasi, ishsiz yoshlarni kasb-hunarga yo‘naltirish, doimiy ish bilan ta’minlash, tadbirkorlikka jalb qilish hamda ularning bo‘sh vaqtlarini mazmunli tashkil etish yuzasidan amalga oshirilayotgan ishlar ko‘rib chiqildi. Shuningdek, “Yoshlar daftari”ga kiritilgan fuqarolar bilan olib borilayotgan manzilli ishlar va ularga ko‘rsatilayotgan amaliy yordam holati ham muhokama qilindi.

Tahlil jarayonida mahalladagi bitiruvchi yoshlarning oliy ta’lim muassasalariga kirish ko‘rsatkichlari, abituriyentlar bilan olib borilayotgan targ‘ibot ishlari, test sinovlariga tayyorgarlik jarayonlari hamda ta’limga qamrovni oshirish bo‘yicha belgilangan chora-tadbirlar yuzasidan mas’ullarning axboroti tinglandi. Oliy ta’limga qiziqishi yuqori bo‘lgan yoshlarni har tomonlama qo‘llab-quvvatlash, ularni imtiyoz va grant imkoniyatlari haqida keng xabardor qilish zarurligi ta’kidlandi.

Shu bilan birga, ishsiz yoshlarning har biri kesimida aniq manzilli rejalar ishlab chiqish, kasb-hunarga o‘qitish markazlariga yo‘naltirish, tadbirkorlik faoliyatini boshlash istagida bo‘lgan yoshlarga imtiyozli kredit va subsidiya imkoniyatlari bo‘yicha tushuntirish ishlarini kuchaytirish yuzasidan taklif va tavsiyalar berildi.