Tashrifdan maqsad — shahar Kengashi qarori asosida maktabda tashkil etilishi va ta’mirlanishi belgilangan inklyuziv xonaning holati bilan yaqindan tanishish hamda qurilish jarayonlarini muvofiqlashtirishdan iborat.

Kengash raisi va ekspert guruhi a’zolari maktab ma’muriyati hamda mutaxassislar bilan uchrashib, inklyuziv ta’lim xonasini zamonaviy standartlar asosida jihozlash masalalarini muhokama qildilar.

O‘rganish davomida ma’lum qilinishicha, ushbu xonani bolalar ehtiyojlariga moslashtirgan holda ta’mirlash uchun quruvchilar tomonidan barcha kerakli o‘lchov ishlari to‘liq yakunlangan.

Maktab mutasaddilari yaqin kunlarda xonada qurilish-ta’mirlash va jihozlash ishlariga jadal kirishilishini hamda yangi o‘quv yiliga to‘liq tayyor holatga keltirilishini ta’kidlashdi.

"Inklyuziv ta’lim — bu shunchaki sinf xonasi emas, bu bolajonlarimizning jamiyatga integratsiyalashuvi, o‘z tengdoshlari bilan birga kamol topishi uchun muhim ko‘prikdir. Kengashimiz qarori bilan ajratilgan mablag‘lar evaziga ushbu xona barcha xavfsizlik va qulaylik talablariga javob beradigan qilib ta’mirlanishi shart. Biz loyihaning boshlanishidan to yakuniga qadar barcha jarayonlarni qat'iy nazorat qilamiz," — dedi Kengash raisi.

Ekspert guruhi a’zolari tomonidan xonani jihozlashda bolalarning jismoniy imkoniyatlaridan kelib chiqib, maxsus mebellar va ko‘rgazmali qurollar bilan ta’minlash bo‘yicha maktab rahbariyatiga amaliy tavsiyalar berildi. Xonaning foydalanishga topshirilish sifati Kengashning doimiy nazoratida qoladi.