Xalq deputatlari Dehqonobod tumani Kengashining Agrar, suv xo‘jaligi va ekologiya masalalari bo‘yicha doimiy komissiyasi a’zolari tomonidan "Qashqadaryo suv ta’minoti" MChJ Dehqonobod tumani filialida joyiga chiqqan holda o‘rganish ishlari olib borildi.

O‘rganish davomida O‘zbekiston Respublikasining "Suv va suvdan foydalanish to‘g‘risida"gi 837-XII-sonli Qonuni ijrosini ta’minlash borasida filial tomonidan amalga oshirilayotgan ishlar, aholini sifatli ichimlik suvi bilan ta’minlash, mavjud suv ta’minoti infratuzilmasining holati, tarmoqlarni modernizatsiya qilish hamda sohaga oid dolzarb masalalar atroflicha tahlil qilindi.

Shuningdek, "Qashqadaryo suv ta’minoti" MChJ Dehqonobod tumani filiali boshlig‘i S. Allanazarov tomonidan qonun ijrosi yuzasidan amalga oshirilayotgan ishlar to‘g‘risida batafsil axborot berildi.

O‘rganish jarayonida deputatlar tomonidan bildirilgan savollarga atroflicha javoblar olinib, sohada mavjud muammolar va ularni bartaraf etish yuzasidan o‘zaro fikr almashildi.

O‘rganish yakunlari bo‘yicha aholini sifatli ichimlik suvi bilan uzluksiz ta’minlash, qonun talablarining samarali ijrosini ta’minlash hamda xizmatlar sifatini yanada yaxshilashga qaratilgan tegishli tavsiya va takliflar bildirildi.

Xalq deputatlari Dehqonobod tumani Kengashining doimiy komissiyalari tomonidan hududlarda qonunlar ijrosini joyiga chiqqan holda o‘rganish va parlament nazoratini samarali amalga oshirish ishlari izchil davom ettirilmoqda.