Ana shunday murojaatlardan biri Orolbo‘yi mahallasi Iqbol ko‘chasidagi ichimlik suvi tarmog‘ida yuzaga kelgan nosozlik bilan bog‘liq bo‘lib, ushbu masala joyiga chiqqan holda o‘rganildi.

Xalq deputatlari Marg‘ilon shahar Kengashi kotibiyat mudiri A.Ermatov, kotibiyat bosh mutaxassisi N.Akbarova hamda 25-Orolbo‘yi saylov okrugi deputati M.Abdurahmonova mahalla fuqarolar yig‘ini raisi A.Mamadaliyev ishtirokida hududda nazorat-tahlil ishlarini amalga oshirdi.

O‘rganish davomida eskirgan ichimlik suvi quvurida nosozlik yuzaga kelgani va buning oqibatida toza ichimlik suvi sizib chiqayotgani aniqlandi.
Mazkur muammoni tezkor bartaraf etish maqsadida “Farg‘ona suv ta’minoti” AJ Marg‘ilon shahar bo‘limi mutaxassisi A.Muqimjonov boshchiligidagi ishchi guruh jalb etildi. Mutaxassislar tomonidan zarur ta’mirlash ishlari amalga oshirilib, ichimlik suvi sizib chiqishi bilan bog‘liq nosozlik bartaraf etildi va suv ta’minotining barqaror ishlashi tiklandi.

Shu bilan birga, o‘rganishlar davomida mazkur hududdagi suv tarmog‘i uzoq yillardan buyon foydalanib kelinayotgani va quvurlarning jismonan eskirgani sababli ularni bosqichma-bosqich yangilash zarurati mavjudligi qayd etildi. Ushbu holat 25-Orolbo‘yi saylov okrugi deputati M.Abdurahmonovaning deputatning ko‘cha aylanish daftariga kiritildi.

Aniqlangan muammoni tizimli hal etish maqsadida mas’ul tashkilotlarga deputat so‘rovi yuborilishi, eskirgan ichimlik suvi tarmog‘ini yangilash masalasini ijobiy hal etish yuzasidan deputatlik nazorati o‘rnatilishi belgilandi.

Fuqarolar murojaatlarini joyida o‘rganish, mavjud muammolarni tezkor bartaraf etish va ularning tizimli yechimini ta’minlash xalq deputatlari mahalliy Kengashlari faoliyatining ustuvor yo‘nalishlaridan biri bo‘lib, bu boradagi ishlar izchil davom ettiriladi.