Xalq deputatlari Jalaquduq tuman Kengashi deputatlari tashabbusi bilan tashkil etilgan “Ogoh bo`ling, firibgar!” aksiyasi doirasida 2-son politexnikum talabalari ishtirokida ma`rifiy tadbir bo`lib o`tdi. Unda politexnikum direktori Qosimjon Xakimov ham ishtirok etib, bugungi kunda internet tarmoqlari orqali sodir etilayotgan jinoyatlar soni ortib borayotgani, ayniqsa yoshlar orasida kiberfiribgarlik qurbonlari ko`payib borayotganini alohida ta`kidladi. Tadbir davomida mutaxassislar tomonidan internet orqali amalga oshirilayotgan firibgarlik turlari — soxta onlayn savdolar, fishing havolalar, bank kartalari ma`lumotlarini qo`lga kiritish, ijtimoiy tarmoqlar orqali aldash
holatlari haqida atroflicha ma`lumot berildi. Shuningdek, shaxsiy ma`lumotlarni himoya qilish, shubhali havolalarga kirmaslik, notanish shaxslarga kod va parollarni bermaslik kabi muhim qoidalar tushuntirildi. Yoshlarga kiberfiribgarlikning mazmun-mohiyati, uning salbiy oqibatlari va bunday holatlarning oldini olish choralari haqida aniq misollar asosida tushunchalar berildi. Talabalar o`zlarini
qiziqtirgan savollarga javob olib, internetdan xavfsiz foydalanish bo`yicha zarur tavsiyalarga ega bo`ldilar. Tadbir yakunida barcha yoshlar
doimiy ravishda ogoh va hushyor bo`lishga, axborot xavfsizligi qoidalariga qat`iy amal qilishga chaqirildi. Bunday ma`rifiy uchrashuvlar yoshlar o`rtasida huquqiy madaniyatni yuksaltirish va jinoyatchilikning oldini olishda muhim ahamiyat kasb etadi.