Tuman markaziy stadionida amalga
oshirilayotgan qurilish-ta’mirlash ishlari deputatlar tomonidan o‘rganildi. 

Xalq deputatlari Quva tuman Kengashi
deputatlari O‘zbekiston Respublikasi Vazirlar Mahkamasining 2025 yil 6 martdagi
8-son bayoni bilan tasdiqlangan “Farg‘ona viloyati Quva tumanini jadal kompleks
rivojlantirish dasturi doirasida amalga oshiriladigan loyihalarni moliyalashtirish
to‘g‘risida”gi 03-03/1-778-son qarori ijrosi doirasida tuman markaziy stadionida
olib borilayotgan qurilish-ta’mirlash ishlarini o‘rgandilar. 

Mazkur loyihaning qiymati 3 milliard
199 million 170 ming so‘mni tashkil etib, qurilish-ta’mirlash ishlari “Mirzo Saodat”
MChJ tomonidan amalga oshirilmoqda. 

O‘rganish jarayonida deputatlar
asosiy e’tiborni stadiondagi ta’mirlash va qurilish ishlarining sifati, maydon infratuzilmasini
yangilash holati, tribunalarning bugungi holati hamda yoshlar va sportchilar uchun
yaratilayotgan sharoitlarga qaratdilar. 

Shuningdek, o‘rganish davomida
aniqlangan kamchiliklar bo‘yicha deputatlar pudratchi tashkilot rahbariyatiga ularni
bartaraf etish yuzasidan tegishli ko‘rsatmalar berdilar. Bundan tashqari, stadionga
tutash hududdagi aholi tomorqalarini sug‘orish uchun mo‘ljallangan, stadion chetidan
o‘tuvchi ariqning ko‘milib tashlangani haqida aholining e’tirozlari tinglandi. Mazkur
ariqni qayta qazish va suv oqishi uchun zarur sharoit yaratish bo‘yicha ham mas’ullarga
aniq vazifalar yuklandi.