Kitob — tafakkur chirog‘i, kutubxona esa yosh avlodni ma’rifat sari yetaklovchi maskandir. O‘quvchilarning kitobxonlik madaniyatini yuksaltirish, ularni mutolaa qilishga qiziqtirish va mustaqil fikrlaydigan avlodni tarbiyalash ta’lim-tarbiya jarayonining muhim yo‘nalishlaridan biridir.

Xalq deputatlari Yangiobod tuman Kengashi raisi, deputat X. Tilakov hamda tuman Kengashi deputati A. Isroilov Sarmich mahallasi 15-sonli umumiy o‘rta ta’lim maktabi kutubxonasida bo‘lib, o‘quvchilarning kitob mutolaasiga bo‘lgan qiziqishi, kutubxonadan foydalanish imkoniyatlari hamda kitobxonlikni targ‘ib qilish borasidagi ishlar bilan tanishdilar.

Kutubxona o‘quvchilarning bilimini mustahkamlash, dunyoqarashini kengaytirish va ma’naviy kamolotini yuksaltirishda alohida o‘rin tutadi. Badiiy adabiyotlar, ilmiy-ommabop kitoblar va fanlarga oid manbalar bilan muntazam tanishib borish yoshlarning fikrlash doirasini kengaytirib, ularni izlanishga undaydi.
Tashrif davomida o‘quvchilarni kitob mutolaasiga keng jalb etish, kutubxona imkoniyatlaridan samarali foydalanish hamda yoshlar orasida kitobxonlik muhitini mustahkamlash masalalariga e’tibor qaratildi.

Deputatlar maktab kutubxonasining ta’lim-tarbiya jarayonidagi ahamiyatini ta’kidlab, o‘quvchilar o‘rtasida mutolaa madaniyatini rivojlantirish, kitobxonlik tadbirlari va tanlovlarini tashkil etish, yoshlarning adabiyotga bo‘lgan qiziqishini yanada oshirish yuzasidan tavsiyalar berdilar.

Maqsad — kitobni yoshlar hayotining ajralmas qismiga aylantirish, bilimga chanqoq, keng dunyoqarashli va mustaqil fikrlaydigan avlodni tarbiyalash.

Zero, kitob bilan oshno bo‘lgan yoshning tafakkuri teran, maqsadi aniq va kelajakka intilishi yuksak bo‘ladi!