Xalq deputatlari tuman Kengashi raisi X.Raximov Uchko‘prik mahallasiga tashrif buyurib, hududda tashkil etilayotgan baliq
va baliq urug‘i yetishtirish laboratoriyasi ish jarayonlari bilan yaqindan tanishdi. Tashrif davomida laboratoriyada amalga oshirilayotgan ishlar, baliqchilik sohasini rivojlantirish bo‘yicha yaratilgan shart-sharoitlar hamda zamonaviy texnologiyalar asosida baliq urug‘ini ko‘paytirish jarayonlari ko‘zdan kechirildi. Mutaxassislar tomonidan laboratoriyaning asosiy faoliyati, baliq turlarini parvarishlash, urug‘ yetishtirish va ularni ko‘paytirish bo‘yicha amalga oshirilayotgan ishlar haqida batafsil ma’lumot berildi. Qayd etilganidek, mazkur laboratoriya hududda baliqchilik tarmog‘ini rivojlantirish, aholini sifatli oziq-ovqat mahsulotlari bilan ta’minlash hamda sohada yangi ish o‘rinlari yaratishda muhim ahamiyat kasb etmoqda. Ayniqsa, baliq urug‘ini mahalliy sharoitda yetishtirish orqali sohada import o‘rnini bosuvchi mahsulotlar hajmini oshirish va baliqchilik xo‘jaliklarini sifatli urug‘ bilan ta’minlash imkoniyati kengayib borayotgani ta’kidlandi. Tuman Kengashi raisi laboratoriya faoliyati bilan tanishar
ekan, sohani yanada rivojlantirish, ishlab chiqarish quvvatlarini kengaytirish, zamonaviy innovatsion texnologiyalarni joriy etish hamda yoshlarni baliqchilik sohasiga keng jalb qilish yuzasidan o‘z taklif va tavsiyalarini bildirdi.