Xalq deputatlari shahar Kengashining “Ijtimoiy soha, yoshlar siyosati, madaniyat va sport masalalari bo‘yicha” doimiy komissiyasi yig‘ilishida fuqarolar murojaatlari bilan ishlash holati yuzasidan axborot eshitildi.

Ma’lumotlarga ko‘ra, 2026-yil 1-aprel holatiga qadar shahar aholisi tomonidan Prezidentning Virtual va Xalq qabulxonalariga jami 1352 ta murojaat kelib tushgan bo‘lib, bu ko‘rsatkich o‘tgan yilning mos davriga nisbatan 54,3 foizga oshgan.

Kelib tushgan murojaatlarning asosiy qismi ko‘rib chiqilib, ularning aksariyati ijobiy hal etilgan. Xususan, ko‘rib chiqilgan murojaatlarning 90 foizdan ortig‘i qanoatlantirilgan bo‘lsa, muammolarning qariyb 40 foizi amalda hal etilgan.

Tahlillarga ko‘ra, murojaatlar asosan ijtimoiy himoya, gaz va elektr ta’minoti, aliment undirish, uy-joy, tibbiy xizmat, moddiy yordam hamda huquqni muhofaza qilish organlari faoliyati bilan bog‘liq masalalarga to‘g‘ri kelmoqda.

Shuningdek, murojaatlarning 14,3 foizini takroriy murojaatlar tashkil etgani alohida e’tibor qaratildi. Eng ko‘p takroriy murojaatlar ayrim mahallalarda, xususan Yangibo‘g‘, Guliston, G‘o‘riavval, Zahro va Chilonzor hududlarida qayd etilgan.

Yig‘ilish yakunida mutasaddi tashkilotlar hamda mahalla fuqarolar yig‘inlari faoliyatini yanada kuchaytirish, fuqarolar murojaatlarini joyida hal etish amaliyotini kengaytirish zarurligi ta’kidlandi. Shuningdek, takroriy murojaatlarning oldini olish, aholi bilan ochiq muloqotlarni ko‘paytirish va murojaatlar bilan ishlash samaradorligini oshirish bo‘yicha aniq vazifalar belgilab olindi. Mazkur yo‘nalishda tizimli ishlarni davom ettirish doimiy komissiya nazoratida bo‘lishi qayd etildi.