Мактабларнинг куз-қиш мавсумига тайёргарлиги ўрганилди
Халқ депутатлари Янгиқўрғон тумани Кенгаши депутати Ёқубжонов Жаҳонгир Зокиржонович сайлов округида жойлашган 36- ва 32-сонли умумий ўрта таълим мактабларида бўлиб, муассасаларнинг куз-қиш мавсумига тайёргарлик ҳолатини ўрганди.
Ўрганиш давомида мактабларнинг иситиш тизими, қозонхоналар ва иситиш ускуналарининг техник ҳолати, синф хоналарида ўқувчилар учун муносиб ҳароратни таъминлаш бўйича амалга оширилаётган ишлар кўздан кечирилди.
Айни пайтда ҳар икки мактабда ҳам кўмир захираси шакллантирилмагани аниқланди. Масъуллар томонидан зарур кўмир маҳсулотлари яқин кунларда етказиб берилиши маълум қилинди.
Депутат кўмир захирасини белгиланган меъёр асосида ўз вақтида шакллантириш, иситиш тизимларини тўлиқ шай ҳолатга келтириш ва аниқланган камчиликларни қисқа муддатда бартараф этиш юзасидан масъулларга тегишли тавсиялар берди.