«ҒАЙРАТ» — ТАЯНЧ МАҲАЛЛАГА АЙЛАНАДИ

Янгиқўрғон тумани ҳокими, Халқ депутатлари Янгиқўрғон тумани Кенгаши депутати Асадулла Нажмиддинов «Ғайрат» маҳалласини «Таянч маҳалла»га айлантириш бўйича белгиланган истиқболли режалар билан танишди.
Ўрганиш жараёнида маҳалланинг мавжуд салоҳияти, аҳоли бандлиги ва даромад манбалари, шунингдек, ҳудудда ишлаб чиқариш ҳамда хизмат кўрсатиш соҳаларини ривожлантириш имкониятлари атрофлича муҳокама қилинди.
«Таянч маҳалла» лойиҳаси доирасида аҳоли учун доимий, барқарор ва юқори даромад келтирадиган янги иш ўринларини яратиш, маҳалланинг ихтисослашувидан келиб чиққан ҳолда хонадонлар томорқасидан самарали фойдаланишга алоҳида эътибор қаратилади.
Шунингдек, маҳалла марказида аҳоли учун қулай ва замонавий шароитлар яратиш, жумладан:
🔹 гузар ва хизмат кўрсатиш объектларини барпо этиш;
🔹 тўйхоналар фаолиятини ривожлантириш;
🔹 болалар майдончаларини ташкил қилиш;
🔹 яшил ҳудудларни кенгайтириш;
🔹 зарур ижтимоий инфратузилма объектларини шакллантириш бўйича вазифалар белгилаб олинди.
«Ғайрат» маҳалласини таянч ҳудуд сифатида ривожлантиришда унга ёндош маҳаллалар билан самарали ҳамкорликни йўлга қўйиш, умумий имкониятлардан унумли фойдаланиш ҳамда ҳудуд аҳолисининг турмуш фаровонлигини ошириш устувор вазифа этиб белгиланди.