Fuqarolik holati dalolatnomalarini yozish (FHDY) bo‘limi faoliyati o‘rganildi

Xalq deputatlari Navoiy shahar Kengashi kotibiyati mudiri Jo‘rabek Hafizov, Xalq deputatlari Navoiy shahar Kengashi deputati Faxriddin Ro‘ziqulov hamda kotibiyat bosh mutaxassisi Diyorbek Toyirov tomonidan Navoiy shahridagi Fuqarolik holati dalolatnomalarini yozish (FHDY) bo‘limi faoliyati joyiga chiqqan holda o‘rganildi.

O‘rganish jarayonida fuqarolarga ko‘rsatilayotgan davlat xizmatlarining sifati, murojaatlarni qabul qilish va ko‘rib chiqish tartibi, tug‘ilganlik, nikoh tuzilganligi, nikohdan ajralganlik, o‘lim hamda fuqarolik holati dalolatnomalarini davlat ro‘yxatidan o‘tkazish bilan bog‘liq xizmatlarning tashkil etilishi bilan yaqindan tanishildi.

Shuningdek, bo‘lim mas’ullari bilan muloqot o‘tkazilib, aholiga tezkor va sifatli davlat xizmatlarini ko‘rsatish, xizmatlar samaradorligini yanada oshirish hamda fuqarolar uchun yaratilgan qulay shart-sharoitlarni kengaytirish masalalari yuzasidan fikr almashildi.

O‘rganish yakunida FHDY bo‘limi faoliyatini yanada takomillashtirish, fuqarolarga ko‘rsatilayotgan davlat xizmatlari sifatini oshirish va xizmat ko‘rsatish jarayonlarini yanada samarali tashkil etish yuzasidan tegishli tavsiyalar bildirildi.

Mazkur o‘rganishlar aholiga ko‘rsatilayotgan davlat xizmatlari sifatini yuksaltirish, fuqarolarning qonuniy manfaatlarini ta’minlash hamda davlat xizmatlari tizimini yanada takomillashtirishga xizmat qiladi.