G‘alaba shah ko‘chasida aniqlangan holat joyida bartaraf etildi

Xalq deputatlari Navoiy shahar Kengashi deputati Feruza Mardonovna Fayziyeva xizmat safarida bo‘lganligi sababli, belgilangan reja-grafikka muvofiq Xalq deputatlari Navoiy shahar Kengashi kotibiyati bosh mutaxassisi M. Astanova tomonidan G‘alaba shoh ko‘chasi, 117-uy oldi hududida o‘rganish ishlari olib borildi.

O‘rganish jarayonida mazkur hududda joylashgan quduq qopqog‘i noma’lum shaxslar tomonidan o‘g‘irlab ketilgani aniqlanib, natijada ochiq qolgan joy atrofida fuqarolar xavfsizligiga tahdid soluvchi holat yuzaga kelgani ma’lum bo‘ldi. Shuningdek, ushbu hududdan muhandislik kommunikatsiya tarmoqlari, jumladan elektr va aloqa kabellari o‘tganligi qayd etildi.

Mazkur holat yuzasidan tegishli xizmat tashkilotlari tomonidan tezkor choralar ko‘rilib, ochiq qolgan joyga KKS (kanalizatsiya kollektor shoxtasi) qopqog‘i o‘rnatildi hamda uning atrofi beton qorishmasi bilan mustahkamlanib, yopildi.

Hozirda hudud to‘liq tartibga keltirilib, fuqarolar xavfsizligi ta’minlangan. Kelgusida bunday holatlarning oldini olish maqsadida muhandislik tarmoqlari joylashgan hududlarda nazoratni kuchaytirish yuzasidan tegishli chora-tadbirlar belgilab olindi.