Xalq deputatlari Zarbdor tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi yig‘ilishi bo‘lib o‘tdi.
Yig‘ilishda Shodlik MFY Nihol massivida barpo etilgan 330 o‘rinli yangi umumiy o‘rta ta’lim maktabi faoliyatini tashkil etish masalasi ko‘rib chiqildi.
Mazkur masala yuzasidan Zarbdor tumani Maktabgacha va maktab ta’limi bo‘limi mudiri Sh.Roziyev hisobot berib, yangi maktab faoliyatini yo‘lga qo‘yish, o‘quvchilarni qamrab olish, pedagog kadrlar bilan ta’minlash hamda ta’lim jarayonini tashkil etish bo‘yicha amalga oshirilayotgan ishlar haqida ma’lumot berdi.
Shuningdek, doimiy komissiya a’zolari tomonidan avval o‘tkazilgan joylardagi o‘rganish natijalari ham muhokama qilinib, aniqlangan kamchiliklarni bartaraf etish, maktabni to‘liq foydalanishga tayyor holga keltirish yuzasidan mas’ullarga tegishli tavsiyalar bildirildi.
Muhokamalar yakunida masala yuzasidan doimiy komissiyaning tegishli xulosasi qabul qilinib, uni Xalq deputatlari Zarbdor tumani Kengashining navbatdagi sessiyasi kun tartibiga kiritish tavsiya etildi.