To‘lovga qobiliyatsizlik to‘g‘risida”gi Qonun – iqtisodiy barqarorlik kafolati

Xalq deputatlari Termiz tuman Kengashi bosh mutaxassisi K. Abdullayeva tomonidan Uchqizil MFYda qonunlar targ‘iboti doirasida O‘zbekiston Respublikasining “To‘lovga qobiliyatsizlik to‘g‘risida”gi Qonuni mazmun-mohiyatiga bag‘ishlangan tadbir o‘tkazildi.

Mazkur qonun O‘zbekiston Respublikasining 2022-yil 12-apreldagi O‘RQ–763-son Qonuni bilan qabul qilingan bo‘lib, iqtisodiy faoliyat subyektlarining moliyaviy barqarorligini ta’minlash, kreditorlar va qarzdorlarning huquq hamda manfaatlarini himoya qilish, shuningdek, to‘lovga qobiliyatsizlik holatlarining oldini olishga qaratilgan.

Tadbir davomida qonunning mazmun-mohiyati, amaliy ahamiyati hamda fuqarolar va tadbirkorlik subyektlari uchun yaratilayotgan huquqiy imkoniyatlar haqida batafsil tushuntirishlar berildi. Ishtirokchilar bilan ochiq muloqot o‘tkazilib, ularni qiziqtirgan savollarga javob qaytarildi.

Tadbir yakunida K. Abdullayeva bu kabi huquqiy targ‘ibot tadbirlarini aholi o‘rtasida so‘rovnomalar asosida tashkil etish, fuqarolarning ehtiyoj va takliflarini o‘rganish orqali huquqiy savodxonlikni yanada oshirish lozimligini alohida ta’kidladi.

✅ Huquqiy bilim va madaniyatni yuksaltirish – qonun ustuvorligini ta’minlash hamda jamiyat taraqqiyotiga xizmat qiladi.