Xalq deputatlari tuman Kengashi kotibiyati mudiri G.Bobojonova hamda tuman Kengashi deputati N.Nishonovlar Cho‘lobod mahallasida bo‘lib, mahalla yettiligi faoliyati, aholi bilan ishlash tizimi va hududda amalga oshirilayotgan ijtimoiy-iqtisodiy ishlar bilan yaqindan tanishdilar. Tashrif doirasida mahalla raisi va mahalla yettiligi a’zolari ishtirokida uchrashuv o‘tkazilib, mahallada olib borilayotgan ishlar, aholi murojaatlarini o‘rganish va hal etish, ijtimoiy himoyaga muhtoj oilalarni qo‘llab-quvvatlash, yoshlar va xotin-qizlar bilan ishlash
hamda bandlikni ta’minlash borasidagi faoliyat muhokama qilindi. Uchrashuv davomida mahalla yettiligi a’zolari tomonidan o‘z yo‘nalishlari bo‘yicha amalga oshirilayotgan ishlar haqida ma’lumotlar berildi. Jumladan, profilaktika inspektori tomonidan huquqbuzarliklarning oldini olish va jamoat xavfsizligini ta’minlash, yoshlar yetakchisi tomonidan yoshlarni qo‘llab-quvvatlash va ularning bandligini ta’minlash, xotin-qizlar faoli tomonidan ayollar muammolarini hal etish bo‘yicha amalga oshirilayotgan ishlar xususida axborot taqdim etildi.