Xalq deputatlari Qo‘qon shahar Kengashining navbatdagi sessiyasi kun tartibiga kiritilgan Qo‘qon shahar ekologiya va atrof-muhitni muhofaza qilish bo‘limi rahbarining atrof-muhitni muhofaza qilish holati to‘g‘risidagi hisoboti yuzasidan o‘rganish ishlari olib borildi.

O‘rganishda Xalq deputatlari Qo‘qon shahar Kengashi kotibiyati mudiri A.Nosirov hamda shahar Kengashi kotibiyati bosh mutaxassisi X.Abdullayevlar tomonidan “Indorama” xorijiy korxonasi faoliyati bilan yaqindan tanishilib, ishlab chiqarish jarayonlarining ekologik talablarga muvofiqligi ko‘zdan kechirildi. Xususan, korxonada atmosfera havosining changlanish darajasini nazorat qilish uchun o‘rnatilgan zamonaviy monitoring uskunalari, hududda barpo etilgan yashil belbog‘ hamda korxona laboratoriyasining faoliyati o‘rganildi.

Shuningdek, shahar Ekologiya bo‘limi hisobotida keltirilgan ma’lumotlar asosida ishlab chiqarish jarayonida atrof-muhitga salbiy ta’sirni kamaytirish maqsadida o‘rnatilgan filtr tizimlarining samaradorligi bilan tanishildi.

Korxonada kimyoviy ishlov berish jarayonlarida qo‘llanilayotgan mahsulotlarning ekologik xavfsizligini ta’minlash, ularning atrof-muhitga ta’sirini nazorat qilish bo‘yicha laboratoriya tomonidan amalga oshirilayotgan monitoring ishlari yuzasidan mas’ullarning axborotlari tinglandi.

O‘rganish yakunida atrof-muhitni muhofaza qilish, ekologik xavfsizlikni ta’minlash hamda ishlab chiqarish korxonalarida amaldagi ekologik me’yor va talablarga qat’iy rioya etilishi masalalariga alohida e’tibor qaratildi.

Mazkur o‘rganish sessiyada ko‘rib chiqiladigan masalalar bo‘yicha asoslantirilgan xulosalar tayyorlash va ekologik nazorat samaradorligini oshirishga xizmat qiladi.

Xalq deputatlari Qo‘qon shahar Kengashi