Xalq deputatlari Qo‘qon shahar Kengashining navbatdagi sessiyasi kun tartibiga kiritilgan “Dolzarb 90 kunlik” dasturini tasdiqlash to‘g‘risidagi masala yuzasidan shahar Kengashi deputati G.Rasulova tomonidan Qo‘qon shahar 12-umumta’lim maktabi hamda Pedagogika texnikumida o‘quvchilarning yozgi ta’til davrini mazmunli tashkil etish bo‘yicha olib borilayotgan ishlar o‘rganildi.

O‘rganish davomida ta’lim muassasalarida tashkil etilgan sport va kasbga yo‘naltirilgan to‘garaklar faoliyati bilan yaqindan tanishilib, o‘quvchilarning ushbu mashg‘ulotlardagi ishtiroki tahlil qilindi.

Xususan, sport to‘garaklari orqali yoshlarning jismoniy faolligini oshirish, sog‘lom turmush tarzini targ‘ib qilish hamda ularning bo‘sh vaqtini mazmunli tashkil etish borasida yaratilgan shart-sharoitlar ko‘zdan kechirildi.

Shuningdek, kasbga yo‘naltirilgan to‘garaklarda o‘quvchilarning amaliy ko‘nikmalarini rivojlantirish, kelajakdagi kasb tanloviga ko‘maklashish hamda ularni zamonaviy kasblarga qiziqtirish yuzasidan olib borilayotgan ishlar bilan tanishildi.

Ta’lim muassasalari rahbariyati tomonidan yozgi ta’til davrida yoshlarni turli to‘garaklarga keng jalb etish, ularning qiziqish va iste’dodlarini ro‘yobga chiqarish hamda bo‘sh vaqtini samarali tashkil etish bo‘yicha amalga oshirilayotgan tadbirlar haqida ma’lumot berildi.

O‘rganish yakunida o‘quvchilarning sport, kasb-hunar va ijodiy yo‘nalishlardagi mashg‘ulotlarga qamrovini yanada oshirish, mavjud imkoniyatlardan samarali foydalanish hamda yoshlar bilan ishlash samaradorligini kuchaytirish yuzasidan tegishli tavsiyalar bildirildi.

Xalq deputatlari Qo‘qon shahar Kengashi