"Mahalla ligasi"da aql va mahorat sinovdan o‘tdi

Termiz tumanida “Besh tashabbus olimpiadasi” doirasida 30 yoshdan oshgan aholi o‘rtasida shaxmat va shashka bo‘yicha “Mahalla ligasi” musobaqalarining tuman bosqichi bo‘lib o‘tdi.

Musobaqada mahallalardagi saralash bosqichlarida g‘oliblikni qo‘lga kiritgan ishtirokchilar o‘zaro intellektual bellashuvlarda kuch sinashib, strategik fikrlash, mantiqiy tafakkur hamda yuqori mahoratlarini namoyon etdilar.

Qizg‘in va murosasiz kechgan bahslarda xalq deputatlari Termiz tuman Kengashi kotibiyati mudiri A. Avliyakulov ham faol ishtirok etib, shaxmat bahslarida faxrli 1-o‘rinni egalladi.

Musobaqa yakunlariga ko‘ra, shaxmat va shashka yo‘nalishlari bo‘yicha g‘oliblar aniqlanib, tashkilotchilar tomonidan diplom va esdalik sovg‘alari bilan taqdirlandilar. Shuningdek, eng kuchli ishtirokchilar viloyat bosqichida Termiz tumani sharafini himoya qilish huquqini qo‘lga kiritdilar.

Mazkur musobaqa aholining bo‘sh vaqtini mazmunli tashkil etish, sog‘lom turmush tarzini targ‘ib qilish hamda intellektual salohiyatni oshirishda muhim ahamiyat kasb etmoqda.