Namangan shahrida elektrobuslar loyihasi amalga oshiriladi

Xalq deputatlari Namangan shahar Kengashi tomonidan Yevropa tiklanish va taraqqiyot banki ishtirokidagi “Namangan shahar jamoat transporti uchun elektrobuslar xarid qilish va ular bilan bevosita bog‘liq infratuzilmani yaratish” loyihasi konsepsiyasi ma’qullandi.

Mazkur loyiha O‘zbekiston Respublikasi Prezidentining 2025-yil 11-fevraldagi PQ-51-son qaroriga muvofiq amalga oshirilishi rejalashtirilgan bo‘lib, loyiha konsepsiyasi Namangan viloyati transport boshqarmasi tomonidan taqdim etildi hamda xalqaro konsulting kompaniyasi tomonidan ishlab chiqilgan.

Loyiha doirasida Namangan shahri jamoat transporti tizimini modernizatsiya qilish maqsadida 105 dona zamonaviy elektrobus xarid qilinishi hamda ular uchun zarur bo‘lgan infratuzilma — zaryadlash stansiyalari, texnik xizmat ko‘rsatish obyektlari va boshqa zarur tizimlar bosqichma-bosqich tashkil etilishi belgilangan.

Elektrobuslar harakati uchun yo‘nalishlar Namangan shahar yo‘l-transport infratuzilmasini rivojlantirish Bosh rejasi asosida belgilanadi. Shuningdek, tegishli tashkilotlarga loyiha doirasidagi qurilish, yo‘l infratuzilmasi, yo‘l harakati xavfsizligi, kommunikatsiya va obodonlashtirish tadbirlarini o‘z vaqtida amalga oshirish vazifalari yuklatildi.

Mazkur loyiha amalga oshirilishi natijasida:

shahar jamoat transporti sifati oshadi;

ekologik toza transport tizimi rivojlanadi;

yo‘lovchilarga qulayliklar yaratiladi;

shahar transport tizimi zamonaviy bosqichga olib chiqiladi.

Qaror ijrosini nazorat qilish Xalq deputatlari Namangan shahar Kengashining tegishli doimiy komissiyasi hamda shahar hokimining tegishli o‘rinbosari zimmasiga yuklatildi.