Ijtimoiy tarmoqlarda “Urganch shahri «Yangiobod» mahallasidagi tugallanmagan bino — bolalar uchun xavf manbai” sarlavhasi bilan tarqalgan lavha yuzasidan deputatlik o‘rganishlari va nazorati o‘rnatildi. 

Urganch shahar «Yangiobod» mahallasi aholisi tomonidan ko‘tarilgan ushbu dolzarb masala Xalq deputatlari Urganch shahar Kengashi raisi, deputat P.Ro‘ziboyev va deputat B.Allabergenovlar
tomonidan atroflicha o‘rganib chiqilmoqda. 

O‘rganish natijalari bo‘yicha haqiqatan ham, mahalla hududidagi qurilishi tugallanmagan bino atrofida himoya to‘siqlari mavjud emasligi va bino ichiga kirish ochiq qolgani bolalar xavfsizligiga jiddiy tahdid solayotgani tasdiqlandi.  

Hozirda ushbu ob’ektning mulkdori (egasini) aniqlash va nima sababdan qurilish ishlari to‘xtab qolgani yuzasidan shahar qurilish bo‘limi va tegishli mutasaddi tashkilotlarga deputatlik so‘rovi yuborish belgilandi.  

Ob’ekt egasi aniqlangach, binoni qisqa muddatda xavfsiz holatga keltirish (atrofini o‘rash, kirish yo‘llarini yopish) yoki konservatsiya qilish bo‘yicha qat’iy talablar qo‘yiladi. 

"Aholi salomatligi va farzandlarimiz xavfsizligi biz uchun ustuvor vazifa. Ijtimoiy tarmoqlarda ko‘tarilgan har bir asosli e’tiroz deputatlik nazoratiga olinadi va uning ijrosi oxirigacha ta’minlanadi," — deya ta’kidladi soha mas’ullari bilan muloqotda bo‘lgan deputatlar. 

Mazkur masala yuzasidan ko‘rilayotgan choralar va natijalar haqida qo‘shimcha ravishda ma’lumot berib boriladi. Biz fuqarolarning faolligi va mahalladagi muammolarga befarq emasliklari uchun minnatdorchilik bildiramiz.