Xalq deputatlari Olmazor tuman Kengashi raisi Sh.Umarxodjayeva, Xalq deputatlari Olmazor tuman Kengashi deputati D.Raxmatullayev Olmazor tumani 16-sonli oilaviy poliklinikasiga tashrif buyurdi.

 Aholiga o‘z vaqtida va sifatli tibbiy yordam ko‘rsatish masalasi sog‘liqni saqlash tizimining muhim yo‘nalishlaridan biri hisoblanadi. Mazkur yo‘nalish xalq deputatlari uchun tavsiya etilgan 24 ta nazorat yo‘nalishidan biri sifatida belgilangan bo‘lib, uning doirasida Olmazor tumani tibbiyot birlashmasiga qarashli 16-sonli oilaviy poliklinikasida o‘rganish ishlari olib borildi.

O‘rganish jarayonida poliklinikalarda DMED tizimi orqali bemorlar haqidagi ma’lumotlarni elektron shaklda yuritish, eski tibbiy anketalarni raqamli bazaga kiritish hamda tibbiy xizmatlar monitoringini olib borish holati tahlil qilindi. Shuningdek, 103 tez tibbiy yordam xizmatiga murojaat qilgan fuqarolar bilan qayta aloqa o‘rnatish hamda “Ochiq budjet” platformasi orqali xarid qilingan tibbiy jihozlardan samarali foydalanish masalalari ham ko‘rib chiqildi.

O‘rganish natijalari shuni ko‘rsatadiki, birlamchi tibbiy yordam tizimida raqamli texnologiyalarni keng joriy etish, xususan DMED tizimi orqali tibbiy ma’lumotlarni yuritish aholiga ko‘rsatilayotgan xizmatlar sifatini oshirishga xizmat qilmoqda.

Poliklinikaning ish faoliyatini tashkil etish, tibbiy xizmatlar ko‘rsatish darajasi, shuningdek, moddiy-texnik bazasi holati batafsil o‘rganildi.

Alohida e’tibor O‘zbekiston Respublikasi Prezidentining 2024-yil 22-noyabrdagi PQ-402-sonli “Ayollar o‘rtasida onkologik kasalliklarni nazorat qilish tizimini takomillashtirish chora-tadbirlari to‘g‘risida”gi qarori ijrosiga qaratildi.

Onkologik kasalliklarni erta aniqlash, profilaktika qilish hamda o‘z vaqtida tashxis qo‘yishda tizimli yondashuvning muhimligi alohida ta’kidlandi.

Tashrif davomida muassasa bosh shifokori К.Shakirova hamda tibbiyot xodimlari bilan uchrashuv o‘tkazildi. Muloqot davomida muassasa faoliyati samaradorligini yanada oshirishga qaratilgan dolzarb muammolar va takliflar muhokama qilindi.

Aholiga ko‘rsatilayotgan tibbiy yordamning sifati va uning ommabopligini ta’minlash masalalari deputatlik nazoratiga olindi.