Yangi ta’lim-tarbiya maskani ish boshladi 

Oltiariq tumanida “Turon Kids” ta’lim tizimiga qarashli zamonaviy maktabgacha ta’lim tashkiloti foydalanishga topshirildi. Ochilish marosimida tuman hokimi Sh.Turdaliyev, Xalq deputatlari tuman Kengashi raisi, O‘zbekiston Xalq o‘qituvchisi X.Rahimov hamda faollar va nuroniylar ishtirok etdilar. Qiymati 2 milliard so‘mdan ortiq investisiya loyihasi asosida barpo etilgan mazkur muassasa 420 nafar bolani qamrab oladi. Shuningdek, 29 nafar pedagog-tarbiyachi ish bilan ta’minlandi. Bog‘chada o‘zbek va rus guruhlari tashkil etilgan bo‘lib, xorijiy tillar, ot sporti, suzish va turizm yo‘nalishlari bo‘yicha mashg‘ulotlar yo‘lga qo‘yilgan.
Ovqatlanish, transport xizmati va xavfsizlik tizimi yuqori darajada. Ta’kidlanganidek, “Turon” ta’lim tizimi tomonidan yosh avlodni har tomonlama barkamol etib tarbiyalash, ularni Yangi O‘zbekistonning uchinchi Renessans bunyodkorlari etib voyaga yetkazish yo‘lida barcha imkoniyatlar safarbar etilmoqda.