Tadbirkorlikni qo‘llab-quvvatlash — kambag‘allikni qisqartirishning amaliy yo‘li

Prezidentimiz Shavkat Mirziyoyevning Qoraqalpog‘istonga tashrifi davomida aholi bandligi va daromadlarini oshirish, tadbirkorlik tashabbuslarini qo‘llab-quvvatlash bo‘yicha muhim vazifalar belgilandi.

Xususan, oilaviy tadbirkorlik kreditlari stavkasini 17,5 foizdan 12 foizga tushirish, kelgusi yilda ushbu yo‘nalishdagi resurslarni ikki baravar oshirish hamda “drayver” loyihalarga 100 million dollar yo‘naltirish ko‘zda tutilmoqda. Bu orqali kamida 50 ming kishini daromadli qilish maqsad qilingan.
Xalq deputatlari Taxiatosh tumani Kengashiga O‘zbekiston Xalq demokratik partiyasidan saylangan deputat Utemuratov Jiyengali Jolimbetovich:

💬 “Kambag‘allikni qisqartirishni faqat moddiy yordam bilan emas, insonning o‘z mehnati orqali barqaror daromad topishi uchun imkoniyat yaratish bilan bog‘lash kerak.

Shu jihatdan tadbirkorlik uchun moliyaviy imkoniyatlarning kengaytirilishi muhim. Imtiyozli kredit — bu shunchaki ajratilgan mablag‘ emas. U to‘g‘ri yo‘naltirilsa, yangi faoliyat, yangi ish o‘rni va oilaning qo‘shimcha daromad manbaiga aylanishi mumkin.

Ayniqsa, oilaviy tadbirkorlikni qo‘llab-quvvatlashning kuchaytirilishi mahallalarda o‘z biznesini boshlash istagidagi fuqarolar uchun yangi imkoniyatlar ochadi.

XDP deputati sifatida men uchun asosiy mezon — yaratilayotgan iqtisodiy imkoniyatlarning oddiy oilalar hayotida qanday natija berishidir. Agar birgina loyiha bir oilaga daromad olib kelib, yana bir fuqaroni ish bilan ta’minlasa, bu imkoniyatning amaliy samarasidir.

Shuning uchun tadbirkorlikni rivojlantirishni aholi farovonligi bilan bog‘lash, mavjud imkoniyatlardan samarali foydalanish va ularning joylarda amaliy natijasini ta’minlash muhim.”*
— Utemuratov Jiyengali Jolimbetovich
Xalq deputatlari Taxiatosh tumani Kengashiga O‘zbekiston Xalq demokratik partiyasidan saylangan deputat.