Yoshlarning huquq va manfaatlarini himoya qilish, ularning sifatli ta’lim olishi, zamonaviy kasb-hunarlarni egallashi, bandligini ta’minlash hamda tashabbuslarini qo‘llab-quvvatlash — mahalliy Kengashlar faoliyatining muhim yo‘nalishlaridan biridir.

Shu maqsadda, Xalq deputatlari Termiz shahar Kengashi huzuridagi “Yoshlar maslahat” guruhi rahbari S.Nematullayeva shahar yoshlari bilan ochiq va samimiy muloqot o‘tkazdi.

Uchrashuvda yoshlarni qiynayotgan masalalar, ularning ta’lim olishi, kasbiy rivojlanishi va kelgusida munosib o‘rin egallashi bilan bog‘liq muhim masalalar atroflicha muhokama qilindi. Xususan:

Ta’lim va kasbiy rivojlanish: Yoshlarning oliy va professional ta’lim olishi, kontrakt to‘lovlari bo‘yicha amaliy ko‘mak ko‘rsatish, zamonaviy kasb-hunarlar hamda xorijiy tillarni o‘rganish imkoniyatlarini kengaytirish yuzasidan takliflar bildirildi.

Bandlik va daromad manbalarini yaratish: Ta’lim muassasalarini tamomlayotgan yoshlarni mutaxassisligi bo‘yicha munosib ish o‘rinlariga yo‘naltirish, bandligini ta’minlash hamda barqaror daromad manbalarini yaratish masalalariga alohida e’tibor qaratildi.

Yoshlar tadbirkorligini qo‘llab-quvvatlash: O‘z biznesini boshlash istagidagi yoshlar uchun mavjud imkoniyatlar, imtiyozli kredit va subsidiyalardan foydalanish, istiqbolli biznes g‘oyalarni amaliy loyihalarga aylantirish bo‘yicha fikrlar almashildi.

Muloqot davomida yoshlar tomonidan bildirilgan qator murojaatlarga joyida huquqiy tushuntirishlar berildi. Qo‘shimcha o‘rganish va tegishli tashkilotlar bilan hamkorlikni talab qiladigan masalalar esa nazoratga olinib, ularni hal etish bo‘yicha tegishli choralar belgilandi.

Bunday uchrashuvlar orqali yoshlarning fikr va takliflarini bevosita tinglash, ularni qiynayotgan muammolarni aniqlash hamda mavjud imkoniyatlardan samarali foydalanishiga ko‘maklashish maqsad qilingan.

Yoshlar bilan ochiq muloqot — ularning tashabbuslarini qo‘llab-quvvatlash, muammolarini eshitish va amaliy yechimlarga yo‘naltirishning muhim vositasidir.