Xalq deputatlari Qo‘qon shahar Kengashiga 19-“Saoqat” saylov okrugidan saylangan deputat I.Fayzullayev tomonidan “Sobir Abdulla” mahalla fuqarolar yig‘inida navbatdagi saylovchilar bilan uchrashuv va o‘rganish ishlari olib borildi.

Mazkur uchrashuv va o‘rganish ishlarini tashkil etishda Xalq deputatlari Qo‘qon shahar Kengashi kotibiyati bosh mutaxassislari X.Abdullayev va A.Adhamov tomonidan amaliy ko‘mak ko‘rsatildi.

O‘rganish davomida kambag‘allikni qisqartirish va aholi daromadlarini oshirish borasida mahallada amalga oshirilayotgan ishlar, shuningdek, davlatimiz rahbari raisligida 3-sentabr kuni o‘tkazilgan videoselektor yig‘ilishida belgilangan vazifalar ijrosi holatiga alohida e’tibor qaratildi.

Mazkur yo‘nalishda “Sobir Abdulla” MFYda 77 nafar kam ta’minlangan oila “Kambag‘allik reestri”ga kiritilgani, mahalla hududida 10 ta mikroloyiha ishga tushirilishi natijasida 70 nafar oila a’zosi ish bilan ta’minlangani hamda bugungi kunga kelib 70 ta oila “Kambag‘allik reestri”dan chiqarilgani qayd etildi.

Uchrashuvlar davomida “Mahalla yettiligi” hamkorligida kambag‘allikni qisqartirish bo‘yicha ishlarni yanada kuchaytirish, har bir oila uchun barqaror daromad manbaini yaratish, aholini kasb-hunarga o‘qitish va bandligini ta’minlash masalalari muhokama qilindi.

Xalq deputatlari Qo‘qon shahar Kengashi