O‘zbekiston Respublikasi Prezidentining PQ–406-son qarori hamda Oliy Majlis Senati Kengashining KQ–35-V-son qarori ijrosini ta’minlash, shuningdek, mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida hududlarda deputatlik o‘rganishlari davom etmoqda.

Xalq deputatlari Marg‘ilon shahar Kengashi deputati M.Mirzayev tomonidan Marg‘ilon erkin iqtisodiy zonasida yangi loyihalar asosida tashkil etilishi rejalashtirilgan korxonalar faoliyati hamda ularga ajratilgan yer maydonlaridan samarali foydalanish jarayonlari o‘rganildi.

O‘rganish davomida ajratilgan yer maydonlaridan maqsadli va samarali foydalanish, investitsiya loyihalarining belgilangan muddatlarda amalga oshirilishi, yangi ishlab chiqarish quvvatlarini ishga tushirish hamda qo‘shimcha ish o‘rinlari yaratish masalalariga alohida e’tibor qaratildi.

Deputat tomonidan loyiha tashabbuskorlari va mas’ullarga ajratilgan yer maydonlaridan shunchaki foydalanib turish emas, balki ularni belgilangan maqsad asosida o‘zlashtirish, ishlab chiqarish jarayonlarini jadallashtirish hamda yangi ish o‘rinlari yaratishga qaratilgan aniq choralarni ko‘rish zarurligi ta’kidlandi.

O‘rganish yakunlari bo‘yicha aniqlangan masalalar yuzasidan mas’ullarga tegishli vazifalar belgilab berilib, loyihalarning amalga oshirilishi va ajratilgan yer maydonlaridan samarali foydalanish holatini deputatlik nazoratiga olish belgilandi.