Mahalliy Kengash deputati faoliyatining eng muhim 24 ta yo‘nalishi doirasida olib borilgan navbatdagi nazorat-tahlil tadbiri davomida  Xalq deputatlari Termiz shahar Kengashiga 5-"Kattabog‘" saylov okrugidan saylangan deputat I.Tangirov  shuningdek shahar Kengashi kotibiyati bosh mutaxassisi R.Mamashukurov "Kattabog‘" mahallasida bo‘lib, “Mahalla yettiligi” tarkibidagi Yoshlar yetakchisi faoliyatini joyida o‘rgandilar.
O‘rganish jarayonida PF–116-son Farmonining IV-bobi – Yoshlar yetakchisining asosiy vazifalari ijrosi yuzasidan quyidagi yo‘nalishlarga alohida e’tibor qaratildi:
✅ yoshlarning o‘ziga bo‘lgan ishonchini mustahkamlash, ularni jamiyat hayotida faol ishtirok etishga va umummilliy manfaatlarga xizmat qiluvchi loyihalarga jalb etish;
✅ yoshlarning iqtidori va iste’dodini ro‘yobga chiqarishga qaratilgan tadbirlar hamda "Besh tashabbus olimpiadasi" doirasidagi ishlar samaradorligi;
✅ mehnat bozoriga kirib kelayotgan yoshlarni kasb-hunarga yo‘naltirish, tadbirkorlik ko‘nikmalarini rivojlantirish va ularning bandligini ta’minlash bo‘yicha amalga oshirilayotgan chora-tadbirlar;
✅ "Yoshlar daftari"ga kiritilgan yoshlarga ko‘rsatilayotgan yordamning ijtimoiy hamkorlik tamoyili asosida tashkil etilishi va murojaatlar bilan ishlash holati.
Nazorat-tahlil davomida hujjatlar, elektron ma’lumotlar bazasi hamda amalga oshirilgan ishlar joyida ko‘zdan kechirildi. Aniqlangan kamchiliklarni bartaraf etish, faoliyat samaradorligini oshirish va Farmonda belgilangan vazifalar ijrosini sifat jihatidan yangi bosqichga olib chiqish yuzasidan mas’ullarga tegishli tavsiya va ko‘rsatmalar berildi.
Mahallalarda yoshlar bilan ishlash tizimini takomillashtirish, ularning bandligi, ijtimoiy faolligi va salohiyatini ro‘yobga chiqarish bo‘yicha olib borilayotgan ishlar Xalq deputatlari Termiz shahar Kengashi tomonidan muntazam monitoring qilib borilmoqda.