Xalq deputatlari Uchquduq tuman Kengashining 6-“Tog‘” saylov okrugidan saylangan deputati, Uchquduq tumani hokimi U.Yelmuratov tomonidan yoshlar bilan navbatdagi ochiq muloqot tashkil etildi.

Mazkur uchrashuvning asosiy maqsadi yoshlarning fikr va takliflarini bevosita tinglash, ularni qiynayotgan muammolarni o‘rganish hamda mavjud masalalarga amaliy yechimlar ishlab chiqishdan iborat bo‘ldi.

Ochiq muloqot davomida yoshlar tomonidan bandlikni ta’minlash, kasb-hunar va oliy ta’lim, tadbirkorlik faoliyatini boshlash uchun yaratilayotgan imkoniyatlar, imtiyozli kreditlar, uy-joy masalalari, sport va madaniyat yo‘nalishidagi sharoitlarni yanada yaxshilash, bo‘sh vaqtni mazmunli tashkil etish hamda mahallalarda yoshlar bilan ishlash tizimini takomillashtirish yuzasidan qator taklif va murojaatlar bildirildi.

Tuman hokimi har bir murojaatni alohida tinglab, ularning mazmun-mohiyatiga to‘xtaldi hamda tegishli masalalar yuzasidan batafsil tushuntirish va izohlar berdi. O‘z yechimini kutayotgan murojaatlar bo‘yicha mas’ul tashkilot va idoralar rahbarlariga aniq topshiriqlar berilib, ularning ijrosini nazoratga olish belgilandi.

Shuningdek, uchrashuv davomida tumanda yoshlarni qo‘llab-quvvatlash, ularning bilim olishi, kasb egallashi, tadbirkorlik bilan shug‘ullanishi, bo‘sh vaqtini mazmunli o‘tkazishi hamda iqtidorini ro‘yobga chiqarish borasida amalga oshirilayotgan ishlar va istiqboldagi rejalar haqida ham batafsil ma’lumot berildi.

Muloqot samimiy va ochiq ruhda o‘tib, yoshlar o‘zlarini qiziqtirgan savollarga atroflicha javob oldilar. Bunday uchrashuvlar aholining, ayniqsa, yoshlarning davlat boshqaruvidagi ishtirokini kuchaytirish, ularning tashabbuslarini qo‘llab-quvvatlash hamda dolzarb muammolarni joyida hal etishda muhim ahamiyat kasb etadi.

🤝Yoshlar manfaatlarini ta’minlash, ularning orzu-intilishlarini ro‘yobga chiqarish hamda har tomonlama qo‘llab-quvvatlash borasidagi bunday ochiq muloqotlar kelgusida ham izchil davom ettiriladi.