MUSTAQILLIK – TARAQQIYOTNING MUSTAHKAM POYDEVORI

O‘zbekiston Respublikasi davlat mustaqilligining 35 yilligi munosabati bilan Xalq deputatlari Navoiy shahar Kengashi huzurida tashkil etilgan Yoshlar maslahat guruhi a’zolari hamda “Lochin” mahalla fuqarolar yig‘ini hamkorligida ma’naviy-ma’rifiy tadbir tashkil etildi.

Tadbirda talabalar, tyutorlar, faxriy ustozlar va nuroniylar ishtirok etdilar. Ushbu tadbirdan ko‘zlangan asosiy maqsad yoshlar qalbida Vatanga muhabbat, milliy qadriyatlarga hurmat va mustaqillik ne’matlariga daxldorlik tuyg‘usini mustahkamlashdan iborat bo‘ldi.

Tadbir doirasida ishtirokchilar dastlab “Qatag‘on qurbonlari xotirasi” muzeyiga tashrif buyurdilar. Muzeyda ular jadid ma’rifatparvarlari va qatag‘on qurbonlarining hayoti hamda faoliyati, shuningdek, tarixiy eksponatlar va arxiv hujjatlari bilan yaqindan tanishdilar. Mazkur sayohat yoshlarning tariximizga hurmat va ajdodlar xotirasiga ehtirom tuyg‘ularini yanada kuchaytirdi.

Shuningdek, fakultetda “Noming dillarda mangu yashaydi” mavzusida xotira darsi tashkil etildi. Tadbir davomida mustaqillik yillarida mamlakatimizda amalga oshirilgan keng ko‘lamli islohotlar, yoshlar uchun yaratilgan imkoniyatlar hamda yurtimizda hukm surayotgan tinchlik va barqarorlikning ahamiyati haqida atroflicha so‘z yuritildi.

Nuroniylar tomonidan yoshlarga Vatanga sadoqat, milliy qadriyatlarni asrab-avaylash, ilm olish va yurt ravnaqiga munosib hissa qo‘shish borasida hayotiy maslahat hamda tavsiyalar berildi.

Bunday ma’naviy-ma’rifiy tadbirlar yosh avlodni milliy g‘oya va qadriyatlar ruhida tarbiyalash, ularning tarixiy xotirasi hamda fuqarolik mas’uliyatini yuksaltirishda muhim ahamiyat kasb etadi.