#_deputat_faoliyati
#_24_ta_masala
#_kotibiyat_xodimi_faoliyati
#_Kengash_ish_rejasining_ijrosi
Maktabdagi ta’lim sifati va moddiy-texnik baza o‘rganildi

Xalq deputatlari Sariosiyo tumani Kengashining “18-Shoqishloq” saylov okrugidan saylangan deputati F.Yusupov, tuman Kengashi huzuridagi “Ekspertlar guruhi” a’zosi M. Normo‘minova hamda kotibiyati bosh mutaxassisi A.Nasritdinov tomonidan deputat okrugidagi “Daragiston” mahallasida o‘rganish ishlari olib borildi.

O‘rganish ishlari tuman Kengashining 2026-yilga mo‘ljallangan ish rejasining 7-bandi ijrosini ta’minlash maqsadida hududdagi 33-sonli umumiy o‘rta ta’lim maktabida amalga oshirildi.

O‘rganish davomida maktabdagi ta’lim-tarbiya jarayonining tashkil etilishi, o‘quvchilarning darsliklar bilan ta’minlanganlik holati hamda ta’lim sifatini oshirish uchun yaratilgan shart-sharoitlar atroflicha ko‘zdan kechirildi.

Xususan, o‘quvchilarni darsliklar bilan ta’minlash holati, mavjud darsliklarning soni, ularning saqlanishi va foydalanish samaradorligiga alohida e’tibor qaratildi. Shuningdek, yangi o‘quv yilida o‘quvchilarning zarur darslik va o‘quv adabiyotlariga bo‘lgan ehtiyojlarini o‘rganish masalalari ham ko‘rib chiqildi.

Bundan tashqari, maktabda musiqa fanini o‘qitish uchun yaratilgan shart-sharoitlar, musiqa cholg‘u asboblari bilan ta’minlanganlik darajasi, mavjud cholg‘u asboblarining holati va ulardan o‘quv mashg‘ulotlari hamda turli ma’naviy-ma’rifiy tadbirlarda foydalanish samaradorligi o‘rganildi.

O‘rganish jarayonida maktab rahbariyati va mas’ul xodimlar bilan suhbatlashilib, mavjud muammolar, ehtiyojlar va ularni bartaraf etish bo‘yicha takliflar tinglandi.
Shuningdek, ta’lim muassasasida o‘quvchilarning bo‘sh vaqtini mazmunli tashkil etish, ularni musiqa va san’atga keng jalb qilish, iqtidorli yoshlarni qo‘llab-quvvatlash hamda maktabning moddiy-texnik bazasini yanada mustahkamlash masalalariga ham e’tibor qaratildi.

O‘rganish yakunlari bo‘yicha aniqlangan holatlar umumlashtirilib, mavjud kamchiliklarni bartaraf etish va ta’lim sifatini yanada oshirish yuzasidan tegishli tavsiya berildi.

Deputatlik nazorati doirasidagi bunday o‘rganishlar hududdagi ijtimoiy soha obyektlarida mavjud muammolarni aniqlash, ularni tegishli tashkilotlar bilan hamkorlikda hal etish hamda aholi, ayniqsa, yoshlar uchun yaratilayotgan shart-sharoitlarni yaxshilashga xizmat qiladi.