КЎЧА ЁРИТИШ ТИЗИМИНИ ЯХШИЛАШ БЎЙИЧА ДЕПУТАТ СЎРОВИ ЮБОРИЛДИ
Халқ депутатлари Янгиқўрғон тумани Кенгаши депутати Ёкубжонов Жаҳонгир Зокиржонович томонидан сайлов округида жойлашган Мамай, Олмазор ва Қизилёзи маҳаллаларидаги кўча ёритиш тизими ҳолати ўрганилди.
Ўрганиш давомида Туман ободонлаштириш бўлими томонидан ўрнатилган қуёш панелли кўча чироқлари етарли даражада ёруғлик бермаётгани, айримлари хира ёниши натижасида кечки ва тунги вақтларда кўчалар қоронғи бўлиб қолаётгани аниқланди.
Мазкур маҳаллалар чегара ҳудудида жойлашганини инобатга олганда, кўчаларнинг етарли даражада ёритилиши аҳоли хавфсизлиги, жамоат тартиби ва йўл ҳаракати хавфсизлигини таъминлашда муҳим аҳамиятга эга.
Шу муносабат билан депутат томонидан мутасадди ташкилотга депутат сўрови юборилиб, унда:
🔹 кўча ёритиш тизимини жойига чиққан ҳолда ўрганиш;
🔹 хира ёнаётган қуёш панелли чироқларни замонавий ва етарли қувватга эга ёритгичларга алмаштириш;
🔹 имконият мавжуд бўлса, электр тармоғига уланган аввалги кўча чироқларини қайта тиклаш;
🔹 муаммонинг келиб чиқиш сабаблари ва уни бартараф этиш бўйича белгиланган чоралар ҳақида ёзма маълумот тақдим этиш сўралди.
Мазкур депутат сўровининг кўриб чиқилиши ва белгиланган чора-тадбирларнинг ижроси депутатлик назоратига олинди.