Совуқ мавсумга тайёргарлик — бугундан бошланади
Куз-қиш мавсумини беталафот ва барқарор ўтказиш, таълим муассасаларида ўқувчилар ҳамда педагоглар учун муносиб шароитлар яратиш мақсадида тайёргарлик ишлари ҳозирдан бошланди.
Туман ҳокими, Халқ депутатлари Янгиқўрғон тумани Кенгаши депутати Асадулла Нажмиддинов 46- ва 26-сонли умумтаълим мактабларида бўлиб, муассасаларнинг куз-қиш мавсумига тайёргарлик ҳолатини ўрганди.
Ўрганиш давомида мактабларнинг иситиш тизими, қозонхоналар ҳолати, мавжуд иситиш ускуналарининг техник созлиги ҳамда совуқ кунларда хоналарда мўътадил ҳароратни таъминлаш бўйича кўрилаётган чораларга алоҳида эътибор қаратилди.
Масъулларга мавсум бошлангунига қадар аниқланган камчиликларни тўлиқ бартараф этиш, иситиш тизимларини қайта синовдан ўтказиш, зарур ёқилғи ва бошқа ресурслар захирасини шакллантириш бўйича тегишли топшириқлар берилди.
Шунингдек, 26-сонли умумтаълим мактабида 1 миллиард 600 миллион сўм маблағ эвазига таъмирланган мактаб бинолари ва спорт залининг ҳолати кўздан кечирилди. Бажарилган ишларнинг сифати, яратилган шароитлар ҳамда мавжуд камчиликларни бартараф этиш масалалари муҳокама қилинди.
Куз-қиш мавсумига пухта тайёргарлик кўриш — таълим жараёнининг узлуксизлигини таъминлаш ва ўқувчилар учун хавфсиз, илиқ ҳамда қулай муҳит яратишнинг муҳим омилидир.