Birlashgan mahallasidagi 5-sonli umumiy o‘rta ta’lim maktabida yangi 2026/2027 o‘quv yilining boshlanishi munosabati bilan tantanali tadbir bo‘lib o‘tdi.
Tadbirda Xalq deputatlari Sardoba tumani Kengashi raisi R.Tashpulatov ishtirok etib, ustoz va murabbiylar, o‘quvchilar hamda ota-onalarni yangi o‘quv yili bilan samimiy muborakbod etdi.
Kengash raisi o‘z so‘zida mamlakatimizda yosh avlodga sifatli ta’lim berish, ularning har tomonlama kamol topishi uchun munosib sharoitlar yaratishga alohida e’tibor qaratilayotganini ta’kidladi.
Ayniqsa, maktab ostonasidan ilk bor qadam qo‘yayotgan 1-sinf o‘quvchilari uchun bugungi kun hayotidagi eng unutilmas va quvonchli voqealardan biri ekani qayd etildi.
Tantanali tadbirda 1-sinfga qabul qilingan o‘quvchilarga O‘zbekiston Respublikasi Prezidentining an’anaviy “Prezident sovg‘alari” tantanali ravishda tarqatildi. Kichik o‘quvchilarning quvonchi, ularning ilk maktab taassurotlari va samimiy tabassumlari tadbirga yana-da ko‘tarinki ruh bag‘ishladi.
R.Tashpulatov har bir bolaning ta’lim olishi va kelajakda munosib inson bo‘lib voyaga yetishi jamiyat taraqqiyotining eng muhim omillaridan biri ekanini ta’kidlab, o‘quvchilarga yangi o‘quv yilida ulkan yutuqlar, mustahkam bilim va ezgu maqsadlar tiladi.
Darhaqiqat, bugungi e’tibor va g‘amxo‘rlik — ertangi kunning bilimli, salohiyatli va Vatanga sadoqatli avlodini tarbiyalashga qo‘yilgan mustahkam qadamdir.
🇺🇿 Yangi o‘quv yili — yangi orzular, yangi maqsadlar va yangi yutuqlar sari dadil qadam!