MUNOSABAT

📚 BILIMLAR KUNI — YANGI ORZULAR VA ULKAN MAQSADLAR BOSHLANISHI!

🎓 Xalq deputatlari Olmazor tumani Kengashi deputati To‘rabek Tursunov 2026–2027-o‘quv yilining boshlanishi — Bilimlar kuni munosabati bilan barcha ustoz va murabbiylar, o‘quvchi-yoshlar hamda ota-onalarni samimiy muborakbod etadi.

Yangi o‘quv yili — yangi bilimlar, ezgu maqsadlar va katta orzular sari tashlanayotgan muhim qadamdir.

Bugungi kunda ta’lim-tarbiya sohasini rivojlantirish, yosh avlodga zamonaviy bilim va kasb-hunarlarni egallashi uchun munosib sharoitlar yaratish davlatimiz siyosatining ustuvor yo‘nalishlaridan biridir.

Hech shubhasiz, ulug‘ maqsadlarga erishishda mustahkam poydevor bo‘lib xizmat qiladigan ta’lim va tarbiya sohasiga bundan buyon ham alohida e’tibor qaratishimiz zarur. Maktabni tamomlab, katta hayotga qadam qo‘yadigan farzandlarimiz puxta bilim bilan birga, zamonaviy kasb-hunarlarni ham egallashi uchun barcha imkoniyatlarni yaratish muhim.

🇺🇿 Aziz o‘quvchi-yoshlar!

Sizlarga baxtli va farovon hayot eshiklarini ochadigan eng ishonchli kalit — bilim, bilim va yana bilimdir!

Yoshlikning har bir daqiqasini qadrlang. Yangi bilim, ilg‘or g‘oya va innovatsiyalarni, zamonaviy kasb-hunarlarni puxta egallashga intiling. Ona tilimiz, boy tariximiz va milliy madaniyatimizni chuqur o‘rganish bilan birga, jahon tarixi va xorijiy tillarni ham astoydil o‘zlashtiring.

Izlanishdan, o‘rganishdan va ezgu maqsadlar sari intilishdan hech qachon to‘xtamang!

Ajdodlarimizdan meros bo‘lgan muqaddas zaminimizni butun qalbingiz bilan seving, xalqimiz va Vatanimizga cheksiz sadoqat tuyg‘usi bilan yashang.

Bu ezgu yo‘lda mehribon ustozlaringiz va ota-onalaringizni eng yaqin do‘st hamda maslahatchi deb biling.

🌟 Yangi o‘quv yilini a’lo baholar, katta yutuqlar va unutilmas taassurotlar bilan boshlashingizni tilayman!

Barcha ustoz va murabbiylarga mustahkam sog‘lik, sharafli faoliyatlarida ulkan muvaffaqiyatlar, o‘quvchi-yoshlarga esa ilm yo‘lida omad va zafarlar yor bo‘lishini tilayman.

📖 Bilimlar kuni muborak bo‘lsin!

🇺🇿 Yangi o‘quv yili barchamizga omadli va barakali kelsin!

Xalq deputatlari Olmazor tumani Kengashi deputati
To‘rabek Tursunov