Xalq deputatlari Qo‘qon shahar Kengashi deputati F.Qaxxarova tomonidan Qo‘qon shahrining “Shaldiramoq” mahalla fuqarolar yig‘ini hududidagi ko‘p qavatli uylar oldida bolalar sport maydonchasi qurish masalasi yuzasidan yuborilgan deputatlik so‘roviga Qo‘qon shahar Qurilish va uy-joy kommunal xo‘jaligi bo‘limidan rasmiy javob kelib tushdi.

Deputatlik so‘rovida Turkiston ko‘chasidagi 152-sonli, Shaldiramoq ko‘chasidagi 1–2-sonli hamda Sarboz ko‘chasidagi 32–41-sonli ko‘p qavatli uylar old qismida bolalar sport maydonchasi qurish masalasi ko‘tarilgan.

️Mazkur murojaat yuzasidan tegishli tashkilot tomonidan o‘rganish olib borilib, O‘zbekiston Respublikasi Prezidentining 2026-yil 5-fevraldagi 48-sonli qarorining 2-ilovasiga asosan Qo‘qon shahrida 2026–2027-yillarda ko‘p kvartirali uylarga tutash hududlarda umumiy foydalanishdagi infratuzilma obyektlarini qurish va rekonstruksiya qilish bo‘yicha manzilli dasturga yuqorida ko‘rsatilgan ko‘p qavatli uylar kiritilmaganligi, kelgusida ushbu uylar dasturga kiritilgandan so‘ng bolalar sport maydonchasi qurilishi amalga oshirilishi bildirilgan.

️Shuningdek, amaldagi tartibga ko‘ra, ko‘p kvartirali uylarning umumiy mol-mulkini saqlash, ta’mirlash va obodonlashtirish ishlari mulkdorlar tomonidan to‘lanadigan majburiy badallar hisobidan amalga oshirilishi qayd etilgan.

Xalq deputatlari Qo‘qon shahar Kengashi