#_deputat_faoliyati
#_162_ta_qonun
#_kotibiyat_xodimi_faoliyati
Doimiy komissiya va “Ekspertlar guruhi” hamkorligida madaniyat markazi faoliyati o‘rganildi

Xalq deputatlari Sariosiyo tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi a’zolari, tuman Kengashi huzuridagi “Ekspertlar guruhi” a’zosi M.Normo‘minova hamda tuman Kengashi kotibiyati bosh mutaxassisi N.Xamdamova ishtirokida Sariosiyo tumani Madaniyat markazida o‘rganish ishlari olib borildi.
O‘rganish davomida Madaniyat markazida aholi, ayniqsa, yoshlarning bo‘sh vaqtini mazmunli tashkil etish, ularning madaniy-ma’rifiy saviyasini oshirish, milliy qadriyatlar va an’analarni targ‘ib etish borasida amalga oshirilayotgan ishlar tahlil qilindi.

Shuningdek, tuman Madaniyat markazida o‘tkazilayotgan madaniy-ma’rifiy tadbirlarning mazmun-mohiyati, ularning qamrovi va samaradorligi, mavjud to‘garaklar faoliyati hamda aholi uchun yaratilgan shart-sharoitlar o‘rganildi.

O‘rganish jarayonida xalq deputatlari Sariosiyo tumani Kengashining 2026-yilga mo‘ljallangan ish rejasining 7-bandida belgilangan vazifalar ijrosi manzilli tahlil qilinib, belgilangan vazifalarning amalda bajarilishiga alohida e’tibor qaratildi.

Bundan tashqari, O‘zbekiston Respublikasining 2021-yil 20-yanvardagi “Madaniy faoliyat va madaniyat tashkilotlari to‘g‘risida”gi O‘RQ-668-son Qonuni talablarining ijrosi, madaniyat muassasasining belgilangan vazifalarni amalga oshirishi, madaniy xizmatlar sifatini oshirish va aholiga ko‘rsatilayotgan xizmatlar samaradorligi tahlil etildi.

O‘rganish yakuni bo‘yicha aniqlangan kamchiliklarni bartaraf etish, madaniyat markazi faoliyatini yanada takomillashtirish, madaniy tadbirlar sifatini oshirish hamda aholi va yoshlarni madaniy-ma’rifiy tadbirlarga keng jalb etish yuzasidan tegishli taklif va tavsiyalar berildi.

Bunday o‘rganishlar doimiy komissiya, “Ekspertlar guruhi” va Kengash kotibiyati o‘rtasidagi hamkorlikni yanada kuchaytirish, Kengash qarorlari va ish rejasida belgilangan vazifalar ijrosi ustidan parlament nazoratini samarali tashkil etishga xizmat qiladi.