Deputatlarning saylovchilar bilan samarali muloqotini yo‘lga qo‘yish, hududdagi dolzarb ijtimoiy-iqtisodiy masalalarni o‘z vaqtida aniqlash hamda ularning amaliy yechimini ta’minlash — shahar Kengashi faoliyatining bosh mezonidir.

Shu maqsadda Xalq deputatlari Termiz shahar Kengashi raisi, deputat D.Normuradova tomonidan Kengash deputatlari S.Xodjayeva, X.Xolmuminov hamda G.Abramatovalarning bugungi kundagi deputatlik faoliyati tahliliy-tanqidiy ko‘rib chiqildi.

Muloqot va tahlil davomida ushbu deputatlarning o‘z saylov okruglarida amalga oshirgan amaliy ishlari hamda mas’uliyati atroflicha baholandi:

Saylovchilar bilan muloqot: Okruglarda fuqarolar bilan o‘tkazilgan uchrashuvlar va sayyor qabullarning tizimliligi hamda natijadorligi;

Murojaatlar bilan ishlash: Aholi tomonidan ko‘tarilgan ijtimoiy-maishiy va kommunal muammolarning o‘rganilish holati;

Deputatlik so‘rovlari va nazorat: Hududdagi mavjud kamchiliklarni bartaraf etish yuzasidan mutasaddi idoralarga yuborilgan so‘rovlar va ularga olingan javoblar;

"Mahalla yettiligi" hamkorligi: Okruglardagi mahallalar faoliyati va "yettilik" bilan birgalikda olib borilgan nazorat-tahlil tadbirlari.

Tahlil yakunida Kengash raisi D.Normuradova deputatlarga saylovchilar bilan ishlash samaradorligini yanada oshirish, okruglarda "xonadonbay" o‘rganishlarni ko‘paytirish hamda aniqlangan kamchiliklarni tezkor va sifatli bartaraf etish yuzasidan qat’iy ko‘rsatmalarni berdi.

Deputatlar faoliyatining samaradorligi va natijadorligi doimiy tahlil hamda nazoratda bo‘ladi!